Desde siman pasa Banco di Seguro Social SVb a cuminsa e proceso pa manda tur e pensionadonan di SVb nan jaaropgaaf 2015 mediante post. E siman aki mayoria di nos pensionadonan ta ricibi e jaaropgaaf na cas. SVb ta remarka si cu ta posibel cu algun carta ta wordo entrega na cas despues di otro siman.

SVb kier a pidi tur pensionado kendenan no a ricibi e jaaropgaaf ainda pa fin di september, pa por fabor warda algun dia prome cu tuma contacto SVb pa e jaaropgaaf. Esaki pa evita tardansa na SVb ciendo cu e carta por ser entrega den un di e dianan aki. Si despues di dia 9 di oktober ainda e jaaropgaaf di SVb no a drenta nos ta recomenda pa tuma contacto cu Departamento di Pensioen pa asina toch por ricibi e jaaropgaaf.

E jaaropgaaf aki ta necesario ora di yena e aangifte di belasting pa aña 2015. Tambe tin cierto instancianan cu por pidi pa un jaaropgaaf pa specificacion di entrada. Den caso cu e pensionado no ta yena e papel di belasting no ta necesario pa usa e jaaropgaaf di SVb. Sinembargo como servicio SVb ta toch suministra cada pensionado cu e jaaropgaaf pa e por tin e informacion aki disponibel.

Den caso cu e jaaropgaaf no a ser ricibi despues di dia 9 di oktober, of si tin cualkier otro pregunta of remarka, por tuma contacto cu Departamento di Pensioen na 527 2760, of mediante email na pensioenen@svbaruba.org. Tambe por bishita Departamento di Pensioen den Oranjestad na Vondellaan 21, of den San Nicolas na Bernardstraat 67C. Oficina di pensioen ta habri di dialuna pa diabierna mainta 8:00 te cu 12:00 y merdia di 13:00 te cu 15:00. Tur diaranson merdia Departamento di Pensioen ta cera pa publico.