fbpx

Cambionan Den Ley di Seguro di Malesa y Accident

San NicolasEntrante prome di juli 2016 ta drenta na vigor cambionan den ley di Seguro di Malesa y Seguro di Accident. Esaki por tin consecuencia pa e trahado y e doño di trabao. Den e comunicado aki SVb ta informa tocante e cambionan principal den e leynan aki.

Seguro di Malesa actual
Actualmente e trahado den servicio cu ta ricibi un salario di Afl. 4.550,- of menos pa luna ta sigura mediante e Seguro di Malesa. Entrante prome di juli 2016 trahadonan kende tin un salario di Afl. 5.850,- of menos pa luna tambe ta sigura mediante e Seguro di Malesa.

Adhustacion Premieloongrens
E suma maximo di salario riba cual ta paga prima (premieloongrens) conforme ley di Seguro di Malesa y Seguro di Accident ta subi entrante prome di juli 2016.
E suma maximo ta cambia como lo siguiente:
• Afl. 70.200,- pa aña (tabata Afl. 54.600,-)
• Afl. 5.850,- pa luna (tabata Afl. 4.550,-)
• Afl. 1.350,- pa siman (tabata Afl. 1.050,-)
• Afl. 225,- pa dia trahando 6 dia pa siman (tabata Afl. 175,-)
• Afl. 270,- pa dia trahando 5 dia pa siman (tabata Afl. 210,-)
Ta bon pa observa cu e cambio den premieloongrens no tin ningun consecuencia pa e salario di e trahado. Primanan di Seguro di Malesa y Accident ta ser paga pa e doño di trabao. Lesa mas tocante primanan di SVb akinan: /resumen-di-tarifa-2016/

Procedura di Notifica AO
SVb ta pidi tur trahado kende ta sigura pa e Seguro di Malesa entrante prome di juli 2016 pa tuma bon nota di e reglanan y obligacionnan stipula pa trahado ora e trahado ta incapacita pa traha pa motibo di malesa.
Lesa mas tocante notificacion di AO akinan: /trahado/sector-priva/notificacion-di-ao/

Obligacion di inscripcion
Entrante prome di juli 2016 tur doño di trabao (sea un natuurlijk persoon of rechtspersoon) tin e obligacion pa duna trahado nobo un formulario di inscripcion di SVb.
E trahado mester haya e oportunidad pa bay inscribi na SVb prome e prome dia di trabao, of riba e prome dia di trabao durante oranan di trabao.

Autoridad pa duna boet
Den caso cu e doño di trabao no ta cumpli cu e obligacion di inscripcion aki, SVb tin e autoridad di duna e doño di trabao un boet di no mas cu Afl. 500.000,-.

Carta pa Doño di trabao
Tur doño di trabao lo ricibi un carta specificando mas informacion tocante e cambionan den ley di Seguro di Malesa y Accident. Den caso cu e cambio di ley aki tin consecuencia pa e administracion di un doño di trabao, SVb lo manda un cobransa adicional (nadere voorlopige aanslag) adhusta cu e cambionan aki. Tur doño di trabao ta haya 5 luna pa paga e tarifa adhusta riba e cuenta aki, cual ta cuminsa cana for di 15 augustus 2016 y ta termina cu e ultimo cobransa na 15 december 2016.

Mas informacion
Pa mas informacion por yama SVb na 527-2700 of por email nos na info@svbaruba.org.

Posted by