Notificacion di AO

Print Friendly

Notificacion di AO

Ora e trahado ta incapacita pa traha pa motibo di malesa of accidente (ora e ta arbeidsongeschikt of AO), e trahado mester notifica su doño di trabao y SVb. E unico number corecto pa notifica AO na SVb ta 527 27 82. Esnan cu ta haci uso di e sistema di Webportaal mester yama solamente nan trabao.

No por haya contacto cu SVb na 527 27 82

Den oranan di mainta e liñanan di telefon pa notifica AO por ta hopi druk. Pa tal motibo ta recomenda pa keda na liña na momento cu e sistema automatico tuma e yamada. Na momento cu ta cera e telefon pa yama di nobo, e ta perde su beurt den e rij di yamada. E sistema automatico ta comunica e trahado cu un telefonista den un averahe di 5 minuut. SVb no ta tuma notificacion di AO na otro numbernan di telefon di SVb.
Den caso cu fayonan tecnico impedi SVb pa tuma yamada, e trahado ta keda cu e obligacion di notifica AO na su trabao. E trahado mester keda purba di yama SVb pa notifica.

Orario pa notifica

E trahado ta notifica AO prome cu su orario di trabao. E orarionan pa notifica AO na SVb ta:

  • Dialuna pa diabierna entre 7:00 am y 12:00 pm y entre 1:00 pm y 4:00 pm.
  • Diasabra, diadomingo, dianan di fiesta entre 7:00 am y 11:00 am.

Instruccion ora di notifica AO

Na momento cu e trahado notifica AO, e trahado por haya (un di) e siguiente instruccionnan:

  • E trahado mester presenta pa control na SVb riba e mesun dia.
  • E trahado mester presenta pa control na SVb riba su di tres dia di AO.
  • E trahado mester tuma contacto cu Departamento di Administracion Medico na 527 27 00 pa haya un cita cu un dokter di control.
  • E trahado mester yama SVb atrobe ariba e di tres dia di AO.

Si e trahado no cumpli cu e instruccionnan duna, e ta perde su derecho riba compensacion.

Control na cas

Durante e periodo di AO, e trahado ta keda cas. E ta permiti pa sali solamente pa atende dokter, botica, hospital, specialista of un otro luga similar.
Riba e prome of e di dos dia di AO, e trahado por ricibi bishita di un controlado di SVb. Den caso cu e trahado no ta na cas ora e controlado presenta, e controlado ta laga un carta atras pa e trahado. Den e carta e trahado ta wordo notifica cu e no tabata presente na cas durante control y cu e mester presenta na SVb inmediatamente of e siguiente dia.

Reanuda trabao

Na momento cu e trahado bay traha atrobe e mester notifica SVb di esaki. Tambe si esaki ta riba e di dos of riba e di tres dia despues di a notifica AO. E trahado mester notifica SVb prome cu e orario di su trabao of prome cu 9:00 am.

Control medico na SVb

E trahado cu mester ricibi control medico ta presenta na SVb prome cu 9:00 am. Dilanti e bentana di Administracion Medico ta coy un number. Despues Administracion Medico ta yama e number pa presenta na bentana. Eynan e trahado ta identifica su mes cu un paspoort, rijbewijs of cedula valido y ta entrega su carchi di control na e bentana y ta ricibi un number. Despues dokter ta yama e trahado pa drenta camber pa control medico. Durante e control, dokter di control ta determina si e trahado ta sigui cu AO, of e ta capacita pa traha.

Arbeidsongeschikt (AO)

Un trahado cu dokter di control ta declara AO, mester informa su doño di trabao di e fecha cu e mester presenta na SVb pa control atrobe. Tambe e mester entrega e carchi di control na su trabao pa asina traha copia di esaki.
Pa cu e siguiente control medico na SVb, e trahado mester presenta cu su carchi di control. Pa por tin un miho bista riba e estado di e trahado, dokter di control por pidi e trahado informacion relaciona cu su medicamento. Tambe e dokter por pidi permiso di e trahado pa ricibi informacion di su dokter di cas of specialista.
Den cuadro di e ley di seguro di malesa, solamente e dokternan di SVb ta autorisa pa determina si un asegurado ta AO of AG.

Arbeidsgeschikt (AG)

Un trahado cu dokter di control ta determina capacita pa traha, mester informa su doño di trabao di e fecha cu e ta reanuda trabao. E dia cu e reanuda trabao, e trahado mester entrega e carchi di control na su doño di trabao.

E trahado ta malo riba e dia cu ela keda declara AG

Den caso cu un trahado ta sinti su mes malo ainda of atrobe riba e dia cu ela keda declara AG, e mester presenta na SVb riba e mesun dia pa ricibi control medico.
Si e dokter di control determina cu e trahado ta AG, SVb no ta duna compensacion pa e dia aki.

Bandona Aruba durante AO

E trahado cu dokter di control declara AO, no ta permiti pa bandona Aruba durante e dianan cu e ta AO sin aprobacion di SVb. Solamente esnan cu mester bay den exterior cu un declaracion di AZV por haya permiso di SVb pa bandona Aruba. Pa tur otro forma di tratamento of cualkier otro motibo, SVb no ta duna permiso.
Si e asegurado dicidi di bandona Aruba sin aprobacion, e ta perde su derecho riba compensacion den cuadro di e ley di seguro di malesa y accidente durante e periodo cu e ta den exterior.

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of medio e formulario aki.

Share

Comments are closed.