fbpx

Pensioen di Viuda

Kico ta e pensioen di viudo y viuda (AWW)?

E Ley di Seguro di Viudo y Huerfano (Algemene Wezen- en Weduwen-verzekering of AWW) ta un seguro pa tur persona cual ta cubri e consecuencianan financiero di fayecimento di un casa cual ta un asegurado. Esaki ta nifica cu na momento cu un persona bira un viuda of viudo e ta eligibel pa ricibi un pensioen na acuerdo cu e ley di AWW.

Pa ken e pensioen di viuda of viudo ta?

E pensioen di viuda of viudo ta pa tur persona cual su esposa of esposo a fayece. E seguro ta cubri tur pareha casa te na e edad di pensioen.
Na momento cu un viudo of viuda yega e edad di pensioen, e pensioen di viudo ta caduca, y e viuda of viudo ta bin na remarca pa ricibi un pensioen di biehes. E persona cu ta ricibi un pensioen di viudo no ta ricibi e pensioen di biehes automaticamente ora e yega e edad di pensioen. E mester aplica na SVb di nobo pa ricibi e pensioen di biehes.
Tambe den caso cu un viudo of viuda casa di nobo e pensioen di viudo ta caduca.

Cuanto e pensioen di viuda of viudo ta?

E edad y suma di pensioen pa viuda of viudo ta:

    • Te cu 39 aña: Afl. 512,- pa luna.
    • Di 40 te cu 48 aña: Afl. 687,- pa luna.

Entrante 1 di januari 2015 e edad di pensioen di viuda y viudo a cambia. Durante un periodo di 10 aña, cada aña e edad ta subi cu un mey aña pa esnan cu edad di 58 of mas. Por mira esaki riba e siguiente tabel:

Entrante Edad pa Afl. 868,- pa luna Edad pa Afl. 1.132,- pa luna
1 januari 2015 49 te 58,5 aña 58,5 te 60,5 aña
1 januari 2016 49 te 59 aña 59 te 61 aña
1 januari 2017 49 te 59,5 aña 59,5 te 61,5 aña
1 januari 2018 49 te 60 aña 60 te 62 aña
1 januari 2019 49 te 60,5 aña 60,5 te 62,5 aña
1 januari 2020 49 te 61 aña 61 te 63 aña
1 januari 2021 49 te 61,5 aña 61,5 te 63,5 aña
1 januari 2022 49 te 62 aña 62 te 64 aña
1 januari 2023 49 te 62,5 aña 62,5 te 64,5 aña
1 januari 2024 49 te 63 aña 63 te 65 aña

Si un viudo of viuda tin yiu(nan) cu ta bayendo school, e viudo of viuda ta ricibi e suma di Afl. 1.132,- pa luna te ora e yiunan yega e edad di 25 aña, te ora e viuda of viudo casa bek di nobo, of te ora nan stop di atende school.

Con un viuda of viudo por aplica pa ricibi pensioen di viudo?

Pa aplica pa pensioen di vuido mester manda e siguiente informacion via email pa pensioenen@svbaruba.org:

  • Copia digital di e paspoort, rijbewijs of cedula valido (preferiblemente e cedula pa SVb tin e number di identificacion, esaki ta acelera e proceso di control na censo).
  • Copia digital di acto di fayecimento di e casa.
  • Un documento oficial cu e number di cuenta na banco.
  • Copia digital di e buki di casamento. Si e pareha a casa afo, e aplicado mester bin cu e certificado di casamento cu tin e stempel di censo.
  • Den caso cu e defunto a fayece pafo di Aruba, mester manda tambe un copia digital di e paspoort di e defunto. Tambe si e defunto a bay afo pa ricibi tratamento medico, SVb mester di e carta di AZV.

Rekisito adicional pa esnan cu ta biba afo

Si e persona cu ta aplica pa e pensioen di viudo no ta biba na Aruba of Hulanda, e ta obliga pa duna SVb un attestatie de vita (prueba na escrito cu e persona indica ta na bida) na momento di aplicacion.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 pa 6 luna. SVb no ta acepta copia di e attestatie di vita. Esnan cu ta biba afo por manda/entrega e attestatie de vita na:

  • Den cierto caso na SVb di ex-Antias Hulandes.
  • Den cierto caso na un embahada Hulandes.

E attestatie de vita ta obtenibel na oficina di gobierno of cerca un abogado of notario.

Cambio personal

Den caso di cambio den e situacion personal di e viuda of viudo e ta obliga pa notifica SVb di esaki dentro di 2 siman en escrito. Esaki entre otro ta den caso di:

  • Cambio di dato personal (adres, number di telefon, cuenta di banco).
  • Den caso cu e viuda of viudo bay biba afo di Aruba of reestablece na Aruba.
  • Den caso cu un viudo of viuda casa.
  • Den caso e yiu(nan) di un viudo of viuda no ta atende school mas.

Den caso cu tin cambio den e situacion personal, esaki por tin consecuencia pa e suma di pensioen. E viuda of viudo tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di demanda bek e sumanan aki.

Terminacion di pensioen

E pensioen di viuda of viudo ta wordo termina bao e siguiente circumstancianan:

  • Na momento cu e viuda of viudo casa di nobo.
  • Na momento cu e viuda of viudo yega e edad di pensioen. E viuda of viudo mester aplica cerca SVb pa ricibi un pensioen di biehes ora e ta bay yega edad di pensioen.

Mas informacion

Pa mas informacion por tuma contacto cu Departamento di Pensioen mediante nos formulario di contact: https://www.svbaruba.org/pensioen/contact-pensioenen/.
Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.
Departamento di Pensioen ta cera pa publico tur diaranson merdia entrante 12:00 PM.