fbpx

Pensioen di Biehes

Kico ta e pensioen di biehes (AOV)?

Pensioen di biehes (Algemene Ouderdomsverzekering of AOV) ta un seguro social pa cubri e consecuencianan financiero di biehes. E asegurado tin derecho riba pensioen entrante e luna despues di e fecha riba cual e pensionado a yega e edad di pensioen.
Entrante 1 januari 2015 e edad di pensioen ta 60,5 aña. Cada aña e edad di pensioen lo sigui subi cu 6 luna te cu 1 januari 2024 ora e edad di pensioen ta bira 65 aña.

Fecha di cambio Pa esnan cu a nace riba of entre Edad nobo di pensioen
1 januari 2015 1 januari 1955 te cu 30 juni 1955 60,5 aña
1 januari 2016 1 juli 1955 te cu 31 december 1955 61 aña
1 januari 2017 1 januari 1956 te cu 30 juni 1956 61,5 aña
1 januari 2018 1 juli 1956 te cu 31 december 1956 62 aña
1 januari 2019 1 januari 1957 te cu 30 juni 1957 62,5 aña
1 januari 2020 1 juli 1957 te cu 31 december 1957 63 aña
1 januari 2021 1 januari 1958 te cu 30 juni 1958 63,5 aña
1 januari 2022 1 juli 1958 te cu 31 december 1958 64 aña
1 januari 2023 1 januari 1959 te cu 30 juni 1959 64,5 aña
1 januari 2024 1 juli 1959 y despues 65 aña

Pa ken e pensioen di biehes ta?

Tur persona cu ta asegurado na Aruba pa e pensioen di biehes por aplica pa por ricibi e pensioen despues di a yega e edad di pensioen. Pa ta un asegurado e persona mester a biba na Aruba entre e edad di 15 aña y e edad di pensioen.

Cuanto e pensioen di biehes ta?

  • Pa un pareha casa bibando hunto e pensioen di biehes ta maximo Afl. 2.130,- pa luna, of Afl. 1.065,- cada uno.
  • Pa un soltera of soltero e pensioen di biehes ta maximo Afl. 1.265,- pa luna.
  • Pa un persona casa cu no ta bibando hunto, of un persona no casa bibando hunto e pensioen di biehes ta maximo Afl. 1.065,- pa luna.

Cada aña e pensionado cu tin derecho riba pensioen durante luna di september ta ricibi un gratificacion di Pasco (Kerstbonus) den luna di december. E Kerstbonus ta 75% di e suma cual e pensionado ta ricibi durante luna di september, y ta wordo paga hunto cu e suma di december.

E sumanan aki no ta inclui e reparatietoeslag.

Reparatietoeslag

E reparatietoeslag ta un compensacion cu Gobierno di Aruba ta otorga, mediante SVb, na e pensionado. E reparatietoeslag no ta forma parti di e pensioen di AOV.

Gobierno di Aruba a tuma e desicion cu tur persona cu ta:

  • inscribi na Registro Civil di Aruba;
  • ricibi un pensioen di AOV/AWW mediante SVb Aruba;

ta ricibi e reparatietoeslag di Afl. 170,- pa luna.

Ki dia e pensioen di biehes ta wordo paga?

SVb ta paga e pensioen di biehes na cuminsamento di cada luna, pues cada luna SVb ta paga e pensioen adelanta. E fechanan di pago ta varia entre dia 2, 3 of 4 di cada luna.
Por wak e fechanan riba e pagina aki:
https://www.svbaruba.org/pensioen/fechanan-di-pago-pensioen-aov-aww/

Reduccion di pensioen

Pa un persona por ricibi e suma maximo di pensioen e mester ta biba na Aruba desde su edad di 15 aña te cu su edad di pensioen. Pa cada aña cu un persona a biba afo desde su di 15 aña e suma di su pensioen ta wordo reduci cu un porcentahe entre 2% pa 2,18%. E porcentahe ta depende di e temporada cu e persona a biba afo, e cantidad di e añanan cu ela a biba afo, na unda e persona tabata biba y su estado civil.

Con mi por aplica pa ricibi pensioen di biehes?

Pa haci e aplicacion mester aplica via e portal di SVb Pensioen. Habri https://pensioenen.svbaruba.org y sigui e siguiente pasonan:

  1. Registra como usuario nobo: siguie e procedura pa crea un cuenta nobo pa e portal di MiPensioen. Tene cuenta cu mester tin un email valido. E password mester tin 6 caracter of mas, y mester tin por lo menos:
    • un mayusculo (A-Z)
    • un minisculo (a-z)
    • un number (0-9)
    • un caracter special, por ehempel : (!@#$%*?)
  2. Ora di a finalisa e registracion e sistema ta manda un email pa confirma. Controla si esaki no a drenta den e spam of junk folder.
  3. Despues cu a confirma e cuenta por login cu e username y password cu a yena anterior.
  4. Den e menu principal ta haya e opcion pa yena un peticion nobo. Sigui cu e procedura akinan.

Pa completa e peticion mester di e siguiente documentonan digital:

  • Un paspoort, rijbewijs of cedula valido. Preferiblemente presenta cu e cedula pa SVb por tuma nota di e number di identificacion. Esaki ta acelera e proceso di control na censo.
  • Un documento oficial cu e number di cuenta na banco.

E persona cu ta aplica pa pensioen despues di a yega e edad di pensioen ta haya pensioen atrasa pa no mas cu 1 aña prome cu e fecha di aplicacion.

Rekisito adicional pa esnan cu ta biba afo

Si e persona cu ta aplica pa pensioen no ta biba na Aruba of Hulanda, e ta obliga pa duna SVb un attestatie de vita (prueba en escrito cu e persona indica ta na bida). Den caso cu e persona ta casa y ta aplica pa ricibi e pensioen pa pareha casa, e mester presenta un attestatie de vita di su casa tambe.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 luna. SVb no ta acepta copia di e attestatie di vita. Pensionadonan cu ta biba afo por entrega e attestatie de vita na:

  • Den cierto caso na SVb di ex-Antias Hulandes.
  • Den cierto caso na un embahada Hulandes.

E attestatie de vita ta obtenibel na oficina di gobierno of cerca un abogado of notario.

Cambio personal

Den caso di cambio den e situacion personal di e pensionado e ta obliga pa notifica SVb di esaki dentro di 2 siman en escrito. Esaki entre otro ta conta pa:

  • Den caso di cambio di datonan personal (adres, number di telefon, cuenta di banco).
  • Den caso si e pensionado bay biba afo di Aruba of reestablece na Aruba.
  • Den caso di fayecimento di casa di pensionado.
  • Den caso di casamento.
  • Den caso di divorcio of separacion.

Cambio den e situacion personal por tin consecuencia pa e suma di pensioen. E pensionado tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di demanda bek e sumanan cu a wordo paga inhustamente.

Gastonan di entiero

Ora cu pensionado fayece SVb ta contribui cu gastonan di entiero:

  • Pensionado casa: SVb ta paga maximo e suma di Afl. 3.471,-.
  • Pensionado soltero:  SVb ta paga 3X e suma di su pensioen mensual.

Mester aplica dentro di 30 dia despues di e fecha di fayecimento pa por ricibi esaki. Den caso cu SVb inhustamente a paga un luna of mas di pensioen despues di e fayecimento e sumanan aki ta wordo reduci for di e suma total pa e gastonan di entiero. Den caso cu e fayecido ta sigura pa gastonan di entiero caba, SVb ta cubri e gastonan di entiero parcialmente.

Lesa mas: http://www.svbaruba.org/pensioen/fayecimento-di-pensionado/

Terminacion di pensioen

Ora un pensionado fayece, su pensioen ta wordo para inmediatamente si e pensionado tabata ricibi un pensioen di soltero. Ta recomenda tur viuda, viudo of famia di un pensionado cu a fayece pa tuma contacto cu oficina di SVb mas pronto posibel despues di fayecimento. Si e fayecido tabata casa bibando hunto, SVb ta paga e pensioen di e defunto pa 3 luna largo despues di e fecha di fayecimento. Den cierto caso e vuida of viudo mester aplica na SVb pa e por ricibi su pensioen di viuda/viudo of soltera/soltero.

Mas informacion

Pa mas informacion por tuma contacto cu Departamento di Pensioenen:

Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.