fbpx

Verlof di Parto (Zwangerschapsverlof)

Verlof di Parto Sector Priva

Trahadonan femenino, sigura bao e Seguro di Malesa di SVb, tin derecho riba compensacion pa dianan di verlof di parto (zwangerschapsverlof), pues dianan liber y compensa prome y despues di parto. E verlof di parto ta core pa un total di 12 siman.

Rekisitonan

Pa haya e dianan compensa e trahado femenino mester cumpli cu e siguiente rekisitonan:
1. E trahado mester ta inscribi na SVb como empleado.
2. E trahado mester trece un declaracion di partera of medico di e fecha di parto.
3. E trahado mester entrega tur documento por lo menos dos (2) luna prome cu e fecha di verlof ta cuminsa, preferibel 3 luna prome cu e fecha di parto.

Na momento cu e trahado cumpli cu e 3 rekisitonan aki, SVb ta duna e trahado un carta cu ta indica e periodo di verlof. E trahado mester entrega un copia di e carta aki na su doño di trabao.

Por email e documentonan aki pa medisch@svbaruba.org.

Compensacion

SVb ta compensa un verlof  total di 12 siman. E trahado por parti e verlof desde 4 te cu 6 siman prome cu e parto, y e resto di e 12 siman despues di parto. Si e trahado duna lus riba un otro fecha cu cual su partera of medico a indica, e fecha aki no tin influencia riba e total di dianan di verlof cu SVb ta aproba. SVb ta compensa 100% di e salario di e trahado cu ta ricibi verlof di parto.

Cambio den Inicio y Duracion di Verlof di Parto

Den caso cu e futuro mama ta notifica AO entre 4 y 6 siman prome cu e fecha di parto, e verlof di parto ta inicia riba e dia cu a notifica AO.

Por ehempel: E mama ta scoge pa bay cu verlof 4 siman prome cu parto. E ta notifica AO 5 siman prome cu parto; esaki ta nifica cu for di e momento ey e  mama su zwangerschapsverlof ta drenta na vigor.

Tambe tene na cuenta cu:

  • Si e baby nace durante di e zwangerschapsverlof prome cu e fecha stipula e verlof di 12 siman ta keda valido.
  • Si e baby nace prome cu e verlof cuminsa, esta prematuro, e verlof di 12 siman ta cuminsa core for di e fecha di nacemento.
  • Si e baby nace despues di e fecha stipula di nacemento, e verlof di 12 siman total ta keda na vigor.

Den caso cu e mama no por traha ainda despues di e verlof di parto e mester meld AO entrante e prome dia despues cu e verlof di parto a caba.

Mas informacion

Pa mas informacion por tuma contacto cu Administracion Medico di SVb via email medisch@svbaruba.org, telefon 527-2700 of via e formulario di contacto.