fbpx

Pensioen di Huerfano

Kico ta e pensioen di huerfano (AWW)?

E Ley di Seguro di Viudo y Huerfano (Algemene Wezen- en Weduwen-verzekering of AWW) ta un seguro pa tur persona cual ta cubri e consecuencianan financiero di fayecimento di un mayor of tur dos mayor cualnan ta asegurado. Esaki ta nifica cu na momento cu un persona bira un huerfano e ta eligibel pa ricibi un pensioen na acuerdo cu e ley di AWW.

Cuanto e pensioen di huerfano ta?

  • E huerfano te cu 9 aña Afl. 423,- pa luna si un mayor a fayece; Afl. 452,- pa luna si ambos mayor a fayece.
  • E huerfano di 10 te cu 14 aña Afl. 452,- pa luna si un mayor a fayece; Afl. 496,- pa luna si ambos mayor a fayece.
  • E huerfano di 15 te cu 24 aña Afl. 496,- pa luna si un mayor a fayece; Afl. 574,- pa luna si ambos mayor a fayece.

E sumanan aki no ta inclui e reparatietoeslag.

Reparatietoeslag

E reparatietoeslag ta un compensacion cu Gobierno di Aruba ta otorga, mediante SVb, na e pensionado. E reparatietoeslag no ta forma parti di e pensioen di AOV.

Gobierno di Aruba a tuma e desicion cu tur persona cu ta:

  • inscribi na Registro Civil di Aruba;
  • ricibi un pensioen di AOV/AWW mediante SVb Aruba;

ta ricibi e reparatietoeslag di Afl. 170,- pa luna.

Pa ken e seguro di huerfano ta?

E seguro di huerfano ta pa:

  • Tur huerfano te cu e edad di 14 aña.
  • Tur huerfano entre 15 y 25 aña cu ta atende school. SVb mester ricibi un declaracion di school cada aña di e huerfano entre 15 y 25 aña.
  • Tur huerfano cu ta parcialmente incapacita of tin un handicap.

Con e huerfano por aplica pa ricibi pensioen di huerfano?

Pa haci e aplicacion e mayor sobreviviente, e voogd of e huerfano mester aplica via e portal di SVb Pensioen. Habri https://pensioenen.svbaruba.org y sigui e siguiente stapnan:

  1. Registra como usuario nobo: siguie e procedura pa crea un cuenta nobo pa e portal di MiPensioen. Tene cuenta cu mester tin un email valido. E password mester tin 6 caracter of mas, y mester tin por lo menos:
    • un mayusculo (A-Z)
    • un minisculo (a-z)
    • un number (0-9)
    • un caracter special, por ehempel : (!@#$%*?)
  2. Ora di a finalisa e registracion e sistema ta manda un email pa confirma. Controla si esaki no a drenta den e spam of junk folder.
  3. Despues cu a confirma e cuenta por login cu e username y password cu a yena anterior.
  4. Den e menu principal ta haya e opcion pa yena un peticion nobo. Sigui cu e procedura akinan.

Pa completa e peticion mester tin e siguiente documentonan digital:

  • Un paspoort, rijbewijs of cedula valido di e huerfano y di e defunto mayor(nan).
  • E acto(nan) di fayecimento.
  • Un documento oficial cu e number di cuenta na banco. E huerfano cu ta menor di edad mester presenta cu e documento di banco di su mayor sobreviviente of di su voogd.

Video di Instruccion Huerfano:
https://youtu.be/X4mu6TJS6T0

Rekisito adicional pa esnan cu ta biba afo

Si e huerfano no ta biba na Aruba of Hulanda, e ta obliga pa duna SVb un attestatie de vita (prueba por escrito cu e persona indica ta na bida) na momento di aplicacion.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 pa 6 luna. SVb no ta acepta copia di e attestatie di vita. Aseguradonan cu ta biba afo por entrega e attestatie de vita na:

  • Den cierto caso na SVb di ex-Antias Hulandes.
  • Den cierto caso na un embahada Hulandes.

E attestatie de vita ta obtenibel na oficina di gobierno of cerca un abogado of notario.

Cambio personal

Den caso di cambio den e situacion personal di e huerfano ta obliga pa notifica SVb di esaki dentro di 2 siman por escrito. Esaki entre otro den caso di:

  • Cambio den dato personal (adres, number di telefon, cuenta di banco).
  • Den caso cu e huerfano bay biba afo di Aruba of reestablece na Aruba.
  • Den caso cu e huerfano stop di atende school.

Den caso cu tin cambio den e situacion personal, esaki por tin consecuencia pa e suma di pensioen. E huerfano, of su mayor of voogd tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di reclama bek e beneficionan aki.

Terminacion di pensioen

E pensioen di huerfano ta wordo termina bao e siguiente circumstancianan:

  • Na momento cu e huerfano yega e edad di 25 aña.
  • Na momento cu huerfano no ta atende school mas desde su di 15 aña. SVb mester ricibi un schoolverklaring di e huerfano desde su edad di 15 aña pa e por sigui ricibi e pensioen di huerfano.

Mas informacion

Pa mas informacion por tuma contacto cu Departamento di Pensioenen:

Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.