Notificacion di AO Departamentonan Gubernamental
SVb su Departamento Salud y Trabao ta participa na tur hefe di departamento gubernamental cu ta haci uzo di Medisoft SVb un adaptacion riba e proceso pa notifica AO durante di e ola number 5 di Covid19.
E proceso di notificacion cuminsando diahuebs 6 di januari lo cana di e siguiente manera:
Funcionario publico cu ta haci uzo di Medisoft SVb ta notifica AO na su hefe di departamento of persona encarga cu maneho di AO.
• E hefe of persona encarga ta notifica AO den e Medisoft SVb manera di custumber (paso 1).
• E hefe of persona encarga mes mester yena e fecha spera di recuperacion (hersteldatum) (Paso 2). Den otro momento non-covid no mag di wordo yena. E fecha spera di recuperacion “verwachte hersteldatum” ta bira e di 6 dia despues di a PCR-test positivo pa Covid19 via di DVG/HOH. Esaki ta nifica cu e persona lo permanece 5
dia den isolacion y riba e di 6 dia despues di test ta AG.
• Click riba e (+) icon rechts banda di “Toon uitgebreide kenmerken” (paso 3 ).
• Click riba e hoki di “Opmerkingen” (paso 4)
• Type den e den e textblok e palabra “Covid” (paso 5)
• Posteriormente click riba OK pa save esaki. (paso 6)
Adhunto na e e-mail aki e splicacion grafico di e 6 pasonan pa sigui na momento di notifica AO den e portal di Sector Publico.
SVb ta pidi colaboracion pa cumpli cu e forma temporal aki pa notifica AO pa asina por yuda contra aresta tardansa den e maneho di e ola number 5 cu ta treciendo hopi reto den nos servicio diario. Hacienda esaki e trahador NO MESTER YAMA SVb e di 2 dia, sino por bay traha riba su AG datum si tur cos ta bon (6 dia despues).
Si e ta malo ainda riba su dia di AG:
E trahado lo mester yama SVb pa por papia cu dokter. Si e trahador no ta desea di comparti cu trabou cu e ta COVID+, lo mester haci e procedura di custumber di melding y yama SVb e di 2 dia.
procedura nobo
SVb ta Adapta Servicio Debi na Aumento Casonan Covid-19
SVb ta adapta servicio debi na aumento casonan Covid-19
ATENCION:
Entrante 31 januari 2022 e adaptacion aki no ta na vigor mas. Tur esnan cu ta bay den cuarentena pa DVG ta sigui e procedura di notifica AO manera normal.
entrante 29 di december 2021
Debi na e aumento di e casonan di Covid-19 y conhuntamente cu esaki e aumento di personanan den cuarentena SVb ta adapta entrante diaranson 29 di december 2021 su servicionan pa loke ta trata notificacion di cuarentena.
E situacion actual a pone cu nos telefon pa comunica cu SVb su callcenter ta sumamente congestiona. Pa remedia e situacion aki y pa por atende cu e congestion SVb ta pidi tur persona cu ta poni den cuarentena door di DVG pa raporta esaki directamente na su doño di trabao.
No mester notifica SVb di su cuarentena.
E doño di trabao lo notifica SVb di su empleado cu ta den cuarentena. Control di cuarentena mandatorio lo sosode door di SVb y DVG.
Esaki lo yuda tene e liñanan telefonico menos congestiona pa personanan cu mester notifica AO pa Covid-19 of otro enfermedad. Si un trahado haya sintoma y test positivo pa Covid1-9 durante su cuarentena e mester notifica AO.
Por meld AO online via di nos website https://ao.svbaruba.org :
- Di dialuna pa diabierna di 7:00 AM pa 3:00 PM
- Den weekend, dianan di fiesta y ATV di 7:00 AM pa 9:00 AM
Por meld na telefon 527-2782:
-
- Di dialuna pa diabierna di 7:00 AM pa 12:00 PM y di 1:00 PM pa 3:00 PM.
- Den weekend, dianan di fiesta y ATV di 7:00 AM pa 11:00 AM
E doño di trabao cu instrui su trahado pa traha for di cas ta liber di haci esaki ya cu e persona den cuarentena no ta malo.
Ora di notifica AO online of via di telefon mester tuma bon nota di e instruccion cu ta keda duna pa e dianan siguiente.
Di parti di SVb nos ta pidi tur nos aseguradonan pa tene cuenta cu e situacion di e pandemia y cu nos ta hacienda nos maximo esfuerso pa atende nos clientenan di e miho forma posibel.
Orario SVb durante dianan di fiesta 2021
SVb Dec 2021
Ahustacion maneho Director Accionista Mayoritario entrante prome di januari 2022
Entrante prome di januari 2022 SVb ta ahusta su maneho pa locual ta trata director of miembronan di gerencia kende tambe ta accionista mayoritario den e empresa (Directeur Grootaandeelhouder of DGA). Hurisdiccion existente ta dicta cu un director of miembro di gerencia no por wordo considera como un trahado pa leynan di seguro pa trahado cu SVb ta maneha, debi na e falta di autoridad den e relacion entre e empresa y e DGA.
Leynan di Seguro di Malesa, Seguro di Accidente y Cessantia ta stipula cu un trahado solamente por wordo considera como tal ora e ta drenta den servicio di of e ta labora personalmente pa un dunado di trabao (articulo 1 Landsverordening Ziekteverzekering & articulo 1 Landsverordening Ongevallenverzekering).
Tambe e relacion entre un miembro di gerencia y un entidad huridico (parcialmente) no por wordo considera como un convenio di trabao (articulo 8 inciso 5 di e Buki 2 di Codigo Civil di Aruba).
Pa e motibonan aki un DGA no por wordo considera como un asegurado di SVb pa su seguronan di trahado. A base di esaki un DGA no por bin na remarca pa ricibi un beneficio di seguro di malesa of accident durante su periodo di incapacidad pa motibo di malesa of accident.
Pa tur claridad ta sigui akibao kendenan ta ser considera como un DGA y como tal no por wordo considera como un trahado (pa locual ta trata Seguro di Malesa, Seguro di Accident y Cessantia):
- E Director Accionista Mayoritario (DGA) como tambe su espos(a)(o) kende directamente of indirectamente ta den posesion di mas cu 50% di accionnan y cu durante e reunion general di e empresa tin derecho pa emiti mas di 50% di voto.
- E Director Accionista Mayoritario (DGA) como tambe su espos(a)(o) di kende su parientenan te cu di tres grado conhuntamente tin posesion di dos tercera parti of mas di e accionnan.
- E Director Accionista Mayoritario como tambe su espos(a)(o) cu no por wordo retira contra di su/nan boluntad, debi cu ta rekiri un cantidad mayoritario cualifica di voto cual no por wordo logra sin voto di e Director Accionista Mayoritario/su espos(a)(o).
- E directornan di un empresa kende banda di ta forma parti di gerencia tur dos ta 50% accionista y mirando nan control ora tuma decision den e empresa, no por wordo retira contra di nan boluntad.
Considerando e clarificacion y nos ahustacion di e maneho riba esaki, SVb lo cuminsa enforsa e maneho aki entrante prome di januari 2022. Empresanan cual tin un DGA registra na SVb como un trahado segura pa e seguronan di trahado lo wordo saca automaticamente for di e administracion di SVb entrante prome di januari 2022.
Den caso cu SVb no tin e informacion mas actual di e empresa, por fabor manda e registro di accionista pa SVb mas pronto cu ta posibel.
Pa mas informacion por tuma contacto cu Departamento di Premieheffing na 527-2700 of via email heffing@svbaruba.org.
Parlamento a aproba e ‘Landsverordening tijdelijke loonsubsidie’.
Diamars 30 november 2021 Parlamento di Aruba a aproba e Landsverordening Tijdelijke Loonsubsidie. Cu e aprobacion aki a formalisa e autoridad di SVb pa colecta sumanan di loonsubsidie cu dunado di trabao a ricibi di mas.
Despues di e anuncio oficial di e landsverordening aki SVb lo reinicia e procedura di colecta di e siguiente forma:
- Dunado di trabao kende tin un debe habri di loonsubsidie cual a ricibi inhustamente, lo ricibi un carta di recordatorio den cual e debe aki ta specifica. Cu e carta aki ta pidi e dunado di trabao pa paga e debe of pa yega na un areglo di pago cu SVb dentro di dies dia di trabao.
- Den caso cu SVb no ricibi un reaccion lo manda un siguiente carta di demanda unda atrobe ta ofrece un oportunidad pa paga e debe of pa yega na un areglo di pago dentro di dies dia di trabao.
- Den caso cu e dunado di trabao keda sin cumpli, deurwaarder di SVb lo presenta un dwangschrift pa cumpli cu pago of yega na un areglo dentro di tres dia di trabao.
- Den caso cu no cumpli cu e dwangschrift e deurwaarder lo continua cu e procedura di embargo.
SVb ta spera cu no lo yega asina leu y ta urgi tur dunado di trabao cu tin debe di loonsubsidie pa tuma contact cu SVb su departamento di Invordering.
Salario Registra na SVb
Conforme e decreto ministerial (MB 681/20 ; MB 681-B/20) di Subsidio di Salario un di e rekisitonan cu mester a cumpli cun’e tabata e reduccion di oranan di trabao cu entre 0% te cu 40%. Consecuentemente e salario a baha cu e mesun porcentahe. Esaki no kiermen cu e salario pa ora “uurloon” a cambia, solamente tabatin un reduccion den cantidad di oranan di trabao pa motibo cu no tabata tin suficiente trabao pa cubri e oranan normal di trabou pa dia.
Pa cu esaki, a yena e porcentahe di reduccion den e luna pa cual ta pidi subsidio di salario y e empleadonan mester a firma tur luna cu ta bay di acuerdo cu e reduccion. Esaki mester a keda entrega tur luna hunto cu e peticion pa subsidio di salario. Ta resalta un biaha mas cu esaki tabata un rekisito pa por a haya e subsidio di salario.
Pues awor cu e subsidio di salario a stop desde 1 di november 2021, no lo por aplica pa esaki mas. Awor cu actividad economico ta mehorando, e dunado di trabao lo por pidi empleadonan pa traha 8 ora bek.
Den caso cu e trahador ta bay bek traha full su oranan segun su contrato laboral e tin derecho tambe riba e salario contrata, ekivalente na su uurloon multiplica cu su oranan di trabao. Cu excepcion si e dunado di trabao hunto cu empleado of sindicato cera otro acuerdo, por ehempel den caso cu e situacion financiero di e compania no ta permiti un aumento di e gastonan salarial. Segun hurisprudencia dunado di trabao pa por yega na e acuerdo tin e obligacion pa habri boeki pa e trahado of sindicato pa demostra cu su situacion financiero ta malo.
Pa cu esaki SVb ta pidi cooperacion tambe di tur dunado di trabao pa ahusta e salarionan atrobe segun e salario stipula den e contrato laboral vigente of e salario nobo segun e acuerdo ultimo cu a cera cu e empleado of sindicato.
Pa informacion tocante obligacion- y derechonan laboral por acudi na Directie Arbeid en Onderzoek (DAO).
Control di Sobrevivencia Islanan BES
control di sobrevivencia
Pago di Subsidio di Salario a termina entrante 1 november 2021
SVb Aruba ta anuncia cu e areglo di Subsidio di Salario a termina entrante 1 di november 2021. Esaki ta nifica cu pa luna di november no lo otorga dicho subsidio mas.
Punto 11 di e areglo di Subsidio di Salario (MB 681/20) ta mara e pago di subsidio di salario na e sosten di likides cu Aruba ta ricibi for di Hulanda. Mirando cu pa e ultimo kwartaal di 2021 esaki no a wordo otorga na Pais Aruba, e ta nifica cu e pago di subsidio di salario no por continua.
SVb Aruba por medio di esaki ta anuncia cu e pago di e subsidio di salario a termina entrante 1 di november 2021. Esaki ta nifica cu entrante luna di november no por aplica pa subsidio di salario mas y no lo tin pago di dicho subsidio mas.
SVb Aruba ta sigui cu e administracion, control y eventual cobransa di e subsidionan cu a ser paga caba y ta sigui procesa tur obhecion cu ta pendiente ainda di e periodonan di subsidio anterior.
Pa mas informacion tocante e areglo di Subsidio di Salario por tuma contacto cu loonsubsidie@svbaruba.org.
Recordatorio Subsidio di Salario – October 2021
Awe, diaranson 27 di october, ta e ultimo dia cu por aplica pa subsidio di salario pa luna di october
Como dunado di trabou bo tin te fin di dia (11:59 pm) pa entrega bo aplicacion. Un dunado di trabou cu ta aplica pa subsidio di salario pa luna di october mester a cumpli cu e pago di tur prima y seguro social pa lunanan di mei 2021 te cu september 2021. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di un dunado di trabou pa paga e primanan aki.
Tambe tur dunado di trabou mester percura pa den nan MiSVb tin e salarionan real di nan trahadonan registra. SVb ta controla esaki y si e dunado di trabou no tin e salario real registra e por afecta e pago di subsidio di salario.
TENE NA CUENTA CU E TA E RESPONSABILIDAD DI E DUNADO DI TRABOU PA CONTROLA E INFORMACION DI APLICACION Y NO DI E TRAHADO. EN CASO CU DUNADO DI TRABOU ENTREGA UN PETICION CU NO TA CORECTO Y/OF CU FALTA INFORMACION ESAKI TA CONDUCI NA RECHASO DI E PETICION PA SUBSIDIO DI SALARIO. VERIFICA TUR DOCUMENTO Y FORMULARIO PROME CU ENTREGA!
Si bo tin pregunta, nos service center digital tey pa asisti bo. Mail nan na loonsubsidie@svbaruba.org.
Aplicacion Sosten Financiero Kwartaal 4 2021
SVb ta anuncia cu e periodo di aplicacion pa Sosten Financiero pa Empresa Chikito y Mediano pa e di cuatro kwartaal di 2021 ta di 22 di october te cu 28 di october, 2021
Empresanan chikito y mediano cu ta bin na remarke pa aplica pa Sosten Financiero pa Empresa Chikito y Mediano (Sosten Financiero) lo ricibi un notificacion di SVb cu mas informacion y nan lo por aplica desde diabierna, 22 di october, 2021 pa 9 ‘or di mainta te cu diahuebs, 28 di october, 2021 na fin di dia (te cu 11:59 PM).
E pago di e Sosten Financiero no ta bay automaticamente y si no aplica, no ta ricibi e sosten financiero.
Pa por tin derecho ariba e Sosten Financiero, e compania mester cumpli cu e siguente rekisitonan:
- E compania ta registra na SVb cu un minimo di 1 y maximo di 50 empleado;
- Tur empleado mester ta registra cerca SVb riba 15 maart 2020;
- E compania ta registra na Camara di Comercio riba 15 maart 2020 (cu excepcion pa esnan cu no tin obligacion legal di ta registra);
- E compania ta registra na Departamento di Impuesto riba 15 maart 2020 y tin un persoonsnummer;
- E compania a cumpli cu declaracion di BBO pa lunanan di april te cu december, 2020 como tambe di januari te cu september 2021;
- E compania ta spera perdida di entrada di benta di por lo menos 25% pa e lunanan october, november y december 2021. E comparacion ta entre october, november y december 2019 cu october, november y december 2021;
- E compania ta estableci fisicamente na Aruba;
- E compania no ta failliet;
- E compania no tin peticion pa suspencion di pago na Corte di Husticia;
- E ayudo di Afl 4.000,- no ta parti di e benta di e compania.
E formulario di aplicacion ta bay ta disponibel den e portal digital MiSVb di e compania. Entrante 22 di october, 2021 pa 9 ‘or di mainta e compania por drenta den su MiSVb cu su credencial y ta busca e formulario. Ta yena esaki completo y primi ariba ENTREGA PETICION. No por haci cambio despues di entrega e peticion y ta 1 oportunidad so tin pa aplica.
SVb sta ehecuta e pago di Sosten Financiero despues cu e periodo di aplicacion sera, riba diabierna 29 di october, 2021.
SVb ta recorda tur dunado di trabou cu nan mester cumpli cu pago di tur prima social como tambe belasting.
Despues di e di tres kwartaal di e Sosten Financiero lo haci un evaluacion di e recuperacion economico pa asina determina si e Sosten Financiero lo sigui pa e ultimo kwartaal di 2021.
Pa facilita e proceso di aplicacion y contesta pregunta di empresa chikito y mediano relaciona cu e programa di Sosten Financiero por tuma contacto cu e Helpdesk via mail na helpdeskmkb@svbaruba.org. Tambe por haya mas informacion riba e pagina di Sosten Financiero: https://www.svbaruba.org/sosten-financiero/.