Servicio Nobo di SVb cu Inscripcion Digital pa Empleadonan Nobo

Awe prome di juli SVb a habri e posibilidad pa doñonan di trabao por inscribi nan empleadonan nobo digital mediante nos website. Tur compania cu recien a actualisa nan datosnan cerca nos (despues di a ricibi un carta pa esaki) a haya un email unda nan por log in riba nos website y asina por cuminsa haci uso di e servicio aki.

Companianan cu ta haci uso di e posibilidad aki ta hay acceso na un formulario unda nan por yena tur datos di un empleado nobo, y hunto cu un copia digital di su identificacion valido ta manda esaki pa SVb mediante nos website. Den e froma aki SVb ta facilita y accelera e proceso pa tur compania por inscribi nan trahadonan nobo. Pues cu e formulario digital aki e necesidad pa un empleado nobo pasa SVb personal pa inscripcion no ta necesario mas, maske cu toch esaki ta keda posibel pa tur cliente di SVb.

SVb por lo pronto lo amplia e cantidad di servicionan cu ta ofrece su clientenan, cuminsando dentro di algun dia caba cu un formulario digital pa procesa cambionan di trahado.

Pa cualkier pregunta of remarka por tuma contacto cu Gino Croes, communicatimedewerker SVb na 527-2740 of por email nos na info@svbaruba.org.

Publica den Doño di Trabao Tagged , , , , |

Video cu Instruccion pa Aplica pa Pensioen Online

Pa por entrega bo peticion pa pensioen di AOV Online, mester haci uso di MiPensioen, e servicio digital di SVb pa tur pensionado. Den e video aki por wak con pa registra y asina entrega bo peticion online pa bo pensioen.

Pa wak e video full habri primi riba e ‘full screen icon’ rechts abao den e pantaya di e video. pa sali for di full screen primi ‘Escape’.

Publica den AOV, AWW, Pensioen Tagged , |

Invitacion Workshop Calculacion Dagloon

UPDATE 22-6-17: Inscripcion pa tur workshop a yena. Si ta interesa pa atende un futuro workshop por tuma contacto cu nos na info@svbaruba.org of na 527-2740.

UPDATE 19-6-17: Inscripcion pa e siman aki ta yen. Nos tin dos dia adicional di workshop riba:

• Diamars 27 juni, 1:00 pm y 3:00 pm
• Diahuebs 29 juni, 1:00 pm y 3:00 pm

pa cual por registra akibao.

Banco di Seguro Social Aruba SVb ta invita tur su clientenan pa atende un workshop riba e topico di Calculacion di Dagloon. Lo a bay tin diferente workshops cualnan ta bay tuma luga na edificio di ATIA (Pedro Gallegostraat 6 na Dakota) riba:

Diaranson 21 juni,  (1:00 pm y 3:00 pm a yena)
Diahuebs 22 juni, (1:00 pm y 3:00 pm a yena)

E workshop aki ta pa doñonan di trabao kende ta desea di haya mas informacion tocante SVb su maneho pa locual ta trata e calculacion di dagloon.

E Workshop no ta dura mas cu 1 ora den cual lo tin amplio posibilidad pa contesta cualkier pregunta. E ora aki ta consisti di 15 minuut di presentacion y e resto di e ora ta pa pregunta y contesta.

Akibao por yena e formulario ‘Registracion Workshop Dagloon’ pa atende un di e workshopnan aki. Encarecidamente nos ta pidi pa cada compania cu kier atende un di e workshop pa atende cu no mas cu 2 persona.

Pa mas informacion tocante e workshop por yama 527-2740.

Publica den Doño di Trabao, Evento Tagged , , , |

Cuentanan Anual (Jaarrekening) di SVb 2016

E cuentanan anual di SVb su fondonan pa aña 2016 a keda cla y ta disponibel pa wak y baha riba nos pagina di cuentanan anual:

Jaarrekening SVb

Publica den Organisacion Tagged , , , |

SVb ta Sigui Inova su Servicio pa e Pensionado

Diahuebs mainta  Banco di Seguro Social Aruba SVb a presenta su servicio nobo pa e pensionado. Den un conferencia di prensa  ir. Edwin Jacobs director conhuntamente cu Luis Tromp hefe di Departamento di Pensioen a presenta un servicio nobo cu a drenta na vigor for di awe prome di juni. SVb ta pensa riba con por brinda un miho servicio na su clientenan. Awor e persona cu yega na edad pa cobra su pensioen di AOV, por haci su peticion online.

Pensioen di biehes (Algemene Ouderdomsverzekering of AOV) ta un seguro social cu ta cubri e consecuencianan financiero di biehes. E asegurado tin derecho riba pensioen entrante e luna despues di e fecha riba cual e ta yega su edad di pensioen. Entrante  1 di januari 2017 e edad di pensioen ta 61,5 aña. Tur persona naci entre 1 di januari y 30 di juni  1956 por aplica 3 luna prome cu e yega su edad di pensioen.  Cada aña e edad di pensioen lo sigui subi cu 6 luna te cu 1 di januari 2024 ora e edad di pensioen lo bira 65 aña.

Pa un persona por ricibi e pensioen di biehes e mester haci su peticion na SVb. Awor e peticion por bay  di manera digital via MiPensioen. Riba nos website por yega riba e portal di MiPensioen, e programa mes lo guia e futuro pensionado kico pa yena riba cada pagina. Ta importante pa tene na cuenta cu mester tin un email adres activo pa por registra como usuario di e portal di SVb. Pa facilita e proceso di peticion SVb a traha un video di instruccion cu lo ta riba riba e website www.svbaruba.org for di dialuna  proximo 5 di juni 20. E video aki ta splica e proceo paso pa paso.  Sra Agnes Arends tabata e prome futuro pensionado cu a bay on line y a haci su peticion pa su pensioen di AOV.

Aplicando online pa e Pensioen di AOV e pensionado no mester yega personalmente na oficina di Pensioen ya cu despues di haci su peticion via e portal, e proceso lo sigui automaticamente. E usuario lo por sigui via di e pagina principal con leuw e proceso di su aplicacion ta.  Aplicando via di e portal di Pensioen ta facil, e proceso lo cana mas lihe y ta sigur un trankilidad pa e futuro pensionado cu no lo tin mester di sinta warda pa wordo atendi. E servicio nobo aki ta facilita e persona cu ta biba den exterior tambe  pa e por haci su peticion digital. Como servicio adicional, na oficina di Pensioen den Vondellaan, a instala computer specialmente pa e pensionado por registra y tambe haci peticion di su pensioen on line.

Banda di haci e peticion pa e pensioen di AOV tambe e pensionado por print diferente documento manera jaaropgaaf, inkomensverklaring, herziening mutatie y toelichting AOV.

Di e forma aki SVb Aruba kier sigui inova y brinda e miho servicio posibel na tur pensionado y futuro pensionado nan na Aruba y rond mundo.

Publica den AOV, AWW, Pensioen Tagged , , , , , , |

Vacatura Hoofd Financiën SVb

Banco di Seguro Social (SVb) ta desplega un tarea importante den e sistema di seguridad social na Aruba. Den e cuadro aki SVb ta ehecuta 5 ley di seguronan social. Tur luna SVb ta percura pa un gran parti di nos comunidad ricibi un entrada mediante pago di dianan di AO, pensioen di biehes y pensioen di viudo y huerfano.
Desde prome di januari 1986, SVb ta brinda seguridad pa Aruba su comunidad.

Pa yuda nos cumpli cu nos metanan nos ta buscando un Hoofd Financiën cu den un forma positivo kier forma parti di nos team.

E Hoofd Financiën ta responsabel pa e calidad di administracion financiero y maneho responsabel di fondonan di SVb. E ta lidera departamento di Finansas cual ta consisti di Financiële Administratie y Inning. E ta percura pa un maneho financiero sano y responsabel y ta conseha directeur di SVb riba e maneho aki, pa salbaguardia y garantisa e posicion financiero di SVb y su fondonan riba termino largo.

E Hoofd Financiën ta entre otro encarga cu:
•    Lidera departamentonan cual ta cay bao Finansas esta Financiële Administratie y Inning.
•    Maneho di finansas di SVb, cual ta encera entre otro produccion, maneho y control di presupuesto y cuentanan anual y inversion di fondonan.
•    Contribui na tur proceso, procedura y formacion di administracion financiero, ademas percura pa su funcionamento optimal y confiabilidad di tur informacion financiero.

E Hoofd Financiën mester tin:
•    Conocemento profundo y experienca  amplio den aplicacion di diferente teoria, modelo, metodo y tecnica riba tereno di contabilidad.
•    Bon conocemento di economia, maneho di fondo, economia di inversion, finansas publico, systemanan di automatisacion y normanan internacional di contabilidad.
•    Conocemento profundo y abilidad pa traduci (cambio di) ley y maneho den proceso, procedura y aplicacionnan di SVb.
•    Abilidad pa produci diferente rapport, recomendacion, analisis, diferente presupuesto y cuentanan anual.

Rekisitonan:
•    Educacion universitario (master) den ramo di contabilidad (Accountancy).
•    Por lo menos 5 aña di experiencia den contabilidad (Accountancy).
•    Experencia amplio den investigacion y analisis di informacionnan financiero ademas produccion di conseho y proposicion di maneho.

Mester ta un persona cu tin capacidad pa lidera, acompaña cu un caracter fuerte, integro, discreto, cu abilidad pa traha bao presion, flexibel, tacto y cu ta tuma iniciativa.

Salario ta conforme e Bezoldigingsregeling Aruba y ta depende di e añanan di experiencia.

SVb ta ofrece entre otro un bon areglo di pensioen y e posibilidad pa atende diferente curso.

Pa mas informacion tocante e vacatura aki por tuma contacto cu directeur ir. Edwin M. Jacobs mediante email na info@svbaruba.org.

Solicitud acompaña pa curriculum vitae y copia di diploma(nan) por wordo dirigi na  directeur ir. Edwin M. Jacobs, solamente mediante nos email info@svbaruba.org.

Ultimo dia pa solicita ta 19 juni pa 4:00 pm.

Un assesment ta forma parti di e procedura di solicitud.

Publica den Organisacion Tagged , , , , |

Anuncio Relaciona cu Ceramento di SVb su Oficinanan

Banco di Seguro Social Aruba SVb ta anuncia cu en conexion cu actividadnan interno e siguiente oficinanan:

  • Pensioenen
  • Callcenter (Notificacion di AO & AG)
  • Medische Administratie (Control Medico & Keuring)

ta cera riba diamars 30 di mei 2017 desde 12:00 pm

Diaranson 31 mei 2017 tur oficina di SVb ta habri na e orario regular atrobe.

E ceramento no lo afecta ningun otro departamento di SVb.

Nos ta ofrece nos disculpa pa e inconveniencia aki.

Publica den Organisacion, Servicio di SVb Tagged , , , |

Anuncio Relaciona cu Ceramento di SVb su Oficinanan

Banco di Seguro Social Aruba SVb ta anuncia cu tur su oficinanan ta cera riba:

•    Diahuebs 25 mei 2017
•    Diabierna 26 mei 2017

Riba e dianan aki trahadonan den sector priva por notifica AO (meld ziek) online riba nos website (www.svbaruba.org/form-notifica-ao) entre 7:00 am te cu 12:00 pm.

Debi na trabaonan di mantencion no ta posibel pa notifica AO mediante nos telefon 527-2782, tampoco riba diasabra 27 of riba diadomingo 28 di mei.

Pa trahadonan publico e systema di Webportaal no lo ta disponibel durante e 4 dianan aki.

Tur notificacion di AO lo wordo tuma y administra entrante dialuna 29 di mei.

Dialuna 29 di mei 2017 tur nos oficinan ta habri na e orarionan regular atroba, y tur nos servicionan ta disponibel atrobe.

Nos ta ofrece nos disculpa pa e inconveniencia aki.

Publica den Servicio di SVb Tagged , , , , , |

Ceramento di algun oficina di SVb Merdia Dia 23 di Mei

Banco di Seguro Social Aruba SVb ta anuncia cu en conexion cu actividadnan interno e siguiente oficinanan:
•    Premieheffing (inscripcion & papelnan pa DIMAS)
•    Cesantia & Ziekteuitkering
•    Invordering
•    Externe Controle
•    Finansas & Inning

ta cera riba:
Diamars 23 di mei 2017 desde 12:00 pm

Diaranson 24 mei 2017 tur oficina di SVb ta habri na e orario regular atrobe.

E ceramento no lo afecta ningun otro departamento di SVb.

Nos ta ofrece nos disculpa pa e inconveniencia aki.

Publica den Organisacion, Servicio di SVb Tagged , , , |

SVb Cera Entrante Dia di Rey te cu Dia di Labor

Banco di Seguro Social Aruba SVb ta anuncia cu en conexion cu Aña di Rey, un dia di ATV pa empleadonan publico y Dia di Labor tur su oficinanan ta cera riba:

  • Diahuebs 27 april 2017
  • Diabierna 28 april 2017
  • Dialuna 1 mei 2017

Notificacion di AO (meld ziek) por wordo haci mediante e formulario di Notifica AO Online riba nos website http://www.svbaruba.org/form-notifica-ao/, for di 7:00 AM te cu 12:00 PM. Tambe por notifica AO mediante nos callcenter na number 527-2782 entre 7:00 Am y 11:00 AM. Diamars 2 mei 2017 tur oficina di SVb ta habri na e orario regular.

E ceramento no lo afecta e sistema di Webportaal di SVb.

Nos ta ofrece nos disculpa pa e inconveniencia aki, ademas ta desea henter Aruba un feliz Dia di Rey y Dia di Labor!

Publica den Doño di Trabao, Organisacion, Pensioen, Servicio di SVb, Trahado Tagged , , , |