SVb ta habri 8 centro pa entrega peticion pa extra reparatie toeslag

Desde dialuna awo pa pensionadonan por ricibi 50 florinExtra Reparatietoeslag extra riba nan pensioen.

ORANJESTAD, Aruba – 14 di februari 2012: SVb ta anuncia cu entrante dialuna dia 18 di februari 2013 lo habri puntonan di entrega den 8 bario rond di Aruba. Na e puntonan aki SVb ta facilita e pensionadonan cu tin derecho riba e reparatietoeslag di Afl. 50 pa luna, pa cu e entrega di nan formulario di peticion. Tur pensionado cu ta biba na Aruba y cu ta ricibi un pensioen di SVb mester a ricibi e formulario aki hunto cu un carta na e adres conoci na SVb.

Director di SVb, Ir. Edwin Jacobs ta splica cu solamente e pensionadonan cu ta bin na remarca pa haya e reparatietoeslag tin cu entrega e formulario aki. E personanan kende ta bin na remarca pa ricibi esaki ta e pensionadonan di SVb kende NO tin otro fuente di entrada adicional na nan pensioen di biehes di SVb. Pues, e pensionadonan cu ta ricibi entrada adicional sea di otro pensioen, huur di apartamento of cas, trabao full time of part time, por ehempel, NO ta bin na remarca pa e reparatietoeslag y no mester entrega e formulario di peticion.

Pa facilita e proceso di entrega di e formulario di peticion, SVb a habri 8 centro di entrega, cual lo ta habri for di dialuna dia 18 di februari. E prome siman e centronan lo ta habri di dialuna pa diadomingo for di 12’or di merdia pa 8’or di anochi (12 p.m. – 8 p.m.). Entrante e di dos siman, desde dialuna dia 25 di februari e centronan lo ta habri di 4’or di atardi pa 8’or di anochi (4 p.m. – 8 p.m.).

Ir. Edwin Jacobs a splica cu e personanan cu ta entrega nan formulario prome cu dia 15 di maart, lo ricibi nan reparatietoeslag di januari, februari, maart y april 2013 hunto cu nan pago di pensioen di april 2013. El a añadi cu mester tene cuenta cu tur formulario mester wordo entrega prome cu dia 1 di april, 2013.

E ocho centronan cu ta habri dialuna awo ta, na Oranjestad – Centro di Bario Playa Pabao; na Dakotra – Centro di Bario Dakota; na San Nicolas – Santa Teresita Center; na Noord – Centro di Bario Noord; na Tanki Leendert – Centro di Bario Tanki Leendert; na Savaneta – Centro di Bario Savaneta; na Piedra Plat y Paradera – Centro Caiquetio (banda veld di Brittania); y na Santa Cruz – Club Estrella.

Tur formulario mester wordo yena corectamente y firma. No ta necesario pa e pensionado haci e entrega personalmente, pues un famia, amigo of conoci por haci esaki na nomber di e pensionado.
Na momento di entrega, e persona cu entrega e formulario lo ricibi un comprobante cu e formulario a wordo entrega.
Na e centronan di entrega lo tin un foyeto obtenibel cual ta duna mas informacion tocante e reparatietoeslag. Si tin cualkier pregunta adicional, por fabor tuma contacto cu e departamento di pensioen di SVb via email na info@svbaruba.org of na telefon 527-2760.

Conforme cu e publicacion di dia 8 di januari haci pa Minister di Finansa y Gobierno di Aruba, tur pensionado cu tin como su unico fuente di entrada e pensioen di SVb, tin derecho riba un reparatietoeslag di Afl. 50 pa luna.

This entry was posted in Pensioen and tagged , . Bookmark the permalink.