SVb preparando pa e Extra Reparatietoeslag

edwinUn di e gruponan cu ta hayando atencion di Gobierno ta e pensionadonan. Por menciona cu entrante 1 di januari 2011 Gobierno a introduci reparatie toeslag di Afl. 50,- pa tur pensionado y desde januari 2013, Gobierno a bolbe introduci un “extra” reparatie toeslag di Afl. 50,- pa e pensionadonan cu tin e pensioen di AOV como nan unico entrada.

E reparatie toeslag introduci na aña 2011 ta keda na vigor y no ta haci distincion, ta solamente esun extra di 2013 ta mara na condicion. “E condicion pa ricibi e extra reparatie toeslag di Afl.50,- ta solamente aplicabel pa e pensionadonan cu tin nan pensioen di AOV coma nan unico fuente di entrada, pues tur e otro pensionadonan cu tin cualkier otro forma di entrada, no ta bin na remarca pa e extra reparatie toeslag aki,” asina Ir. Edwin Jacobs, director di SVb a splica.

E director di SVb a añadi cu den e proximo dianan aki, un total di 17.141 pensionado lo ricibi un carta tocante e derechonan di pensioen, como tambe e reglanan di e extra reparatie toeslag y un formulario cu nan mester yena pa bin na remarca.

Tin ful un preparacion andando pa organisa esaki na un manera responsabel y eficiente pa nos grandinan. P’esey mes a dicidi di bin cu algun punto di entrega den diferente bario di Aruba, pa haci’e mas facil y accesibel pa nos pensionadonan.

“Mirando e cantidad grandi aki di pensionado, ta importante pa nos coordina esaki mas hopi cu ta posibel, pa evita molestia nos grandi nan. Nos ta trahando riba un plan completo pa tin diferente punto di entrega den e barionan y asina permiti nos pensionadonan yega mas facil pa entrega e formulario. Ta necesario tambe pa e pensionadonan yena un peticion y entrega esaki pa por bin na remarca pa e extra reparatie toeslag”, di acuerdo cu Ir. Edwin Jacobs.

Mas leu el a sigui splica cu “E grandinan mes no mester bin, nan por laga otro hende entreg’e pa nan, djis e mester tin e firma corecto, paso SVb ta controla esaki na su turno. Na momento cu entrega e formulario di peticion, lo Bo ricibi un comprobante cu a entrega esaki na SVb, percura pa warda esaki bon. E centronan di entrega lo tin e funcion pa solamente entrega e formulario y esey lo yuda pa e proceso bay mas lihe y facil”.

Ta importante ta pa tur pensionado ta na altura cu si nan tin otro fuente di entrada, nan no ta bin na remarca pa haya e extra reparatie toeslag aki y si den futuro SVb controla y descubri cu un persona a aplica p’e extra reparatie toeslag, siendo e tin otro fuente di entrada, ta tuma sancion, cu ta encera cobra e suma completo y ta ricibi un multa di un suma basta grandi.

Actualmente SVb ta trahando den un forma gradual, pa evita di haya tur e mas di  17 mil pensionado pareu. Ta hayando bon cooperacion di servicio di post y otro siman caba varios pensionado lo cuminsa ricibi nan carta.

Ultimo dia pa entrega e formulario lo ta dia 31 di maart 2013. Lo traha a base di dos grupo. Esunnan cu entrega prome cu dia 15 di maart 2013, lo ricibi e extra reparatie toeslag di januari, februari y maart hunto cu esun di april den luna di april mes. E di dos grupo cu ta core entre 15 di maart te 1 di april, cu lo ricibi nan pago di e lunanan januari te april den esun di mei. Pues tur hende cu ta bin na remarca lo ricibi nan pago manera stipula.

SVb ta pidi un y tur pa ta atento den e proximo dianan, ya cu lo anuncia e puntonan di entrega den prensa local.

This entry was posted in AOV, Pensioen, Servicio di SVb and tagged , . Bookmark the permalink.