Notificacion di AO (Sector Publico)

Notificacion di AO

Ora e trahado publico ta incapacita pa traha pa motibo di malesa of accidente (ora e ta arbeidsongeschikt of AO), e trahado mester notifica su chef van dienst. Desde 1 januari 2012 e unico manera corecto pa notifica AO ta via e sistema di Webportaal. Esaki ta nifica cu e trahado ta yama solamente su chef van dienst y no ta yama SVb pa notifica AO.


Procedura Notifica AO Sector Publico

Procedura Notifica AO Sector Publico (entrante 28 april 2020)

  1. Riba e prome dia ta notifica AO cerca e dunado di trabao. E dunado di trabao ta registra e notificacion den Webportaal.
  2. Si ta sigui malo e di dos dia yama entre 7:00 AM y 9:00 AM na e oficina di control:
  • SVb Oranjestad: 527-2808 (SVb Eagle & Sun Plaza)
  • SVb San Nicolas: 527-2790

No por yama ningun otro number di telefon, tampoco por cambia sitio di control!

  1. Ora di yama oficina di control mester:
    • Duna un number di telefon valido pa SVb yama bek mesun dia.
    • Ta pendiente pa ricibi yamada riba e telefon mesun dia.

Den caso cu SVb yama bek y no ta haya contesta e dia di AO no ta wordo aproba.

  1. Ora SVb yama bek e dokter di control por:
    • Duna un fecha pa bay traha bek (fecha AG). Si ta sigui malo riba e fecha cu ta bay traha bek mester notifica SVb na e number corespondiente cu e sitio di control:
      • SVb Oranjestad: 527-2808 (SVb Eagle & Sun Plaza)
      • SVb San Nicolas: 527-2790
    • Ricibi afspraak pa control medico na SVb.
  2. Solamente cu afspraak ta permiti bishita nos oficinanan. No tin excepcion.
    Pa cada afspraak ta permiti 1 persona drenta, cu excepcion pa esnan den necesidad pa ayudo.

Si tin afspraak pa bishita SVb mester tene cuenta cu lo siguiente:

  1. Ora di drenta mester mustra paspoort, rijbewijs of cedula.
  2. No ta permiti entrada na persona cu griep, keintura y cu tosamento
  3. No por drenta edificio di SVb si no ta riba lista di afspraak.
  4. Sigui e instruccion duna pa bin na remarca pa compensacion.

Sigui e instruccion pa bo dianan di AO wordo reconoci pa SVb.


Orario pa notifica

E trahado semper ta notifica AO prome cu su orario di trabao.

Den caso cu e trahado bira malo na trabao of despues di orario trabao, pero prome cu e departamento ta habri pa tuma su yamada, e mester meld cerca su departamento mas pronto posibel.

Instruccion ora di notifica AO

Si e trahado publico of esnan cu ta uza Webportaal ta sigui malo e siguiente dia, e mester yama SVb Administracion Medico entre 7:00 AM y 9:00 AM pa ricibi instruccion. E number cu e mester yama ta depende di e sitio unda ta ricibi control medico:

  • Si ta ricibi control medico na Playa ta yama: 527-2808 (SVb Eagle & Sun Plaza).
  • Si ta ricibi control medico na San Nicolas ta yama: 527-2790.

Sigui e procedura di notifica AO manera describi ariba.

Den caso cu no ta sigui instruccion di SVb e dia di AO no ta wordo aproba.

Control na cas

Durante e periodo di AO, e trahado ta keda cas. E ta permiti pa sali solamente pa atende dokter, botica, hospital, specialista of un otro luga similar.
Riba e prome dia di AO e trahado por ricibi bishita di personal di SVb.

Reanuda trabao

Na momento cu e trahado bay traha atrobe e ta notifica su chef van dienst di esaki.

Control medico na SVb

E trahado cu mester ricibi control medico ta presenta na SVb na e orario di su afspraak. Na porta e mester identifica su mes cu un paspoort, rijbewijs of cedula valido. Sigui e instruccion di personal di SVb. Durante e control, dokter di control ta determina si e trahado ta sigui AO, of e ta capacita pa traha.

E carnet di AZV NO ta un medio di identificacion valido.

Arbeidsongeschikt (AO)

Un trahado cu dokter di control ta declara AO, mester informa su doño di trabao di e fecha cu e mester presenta na SVb pa control atrobe. Tambe e mester entrega e carchi di control na su trabao pa asina traha copia di esaki.
Pa cu e siguiente control medico na SVb, e trahado mester presenta cu su carchi di control. Pa por tin un miho bista riba e estado di e trahado, dokter di control por pidi e trahado informacion relaciona cu su medicamento. Tambe e dokter por pidi permiso di e trahado pa ricibi informacion di su dokter di cas of specialista.
Solamente e dokternan di SVb ta autorisa pa determina si un trahado ta AO of AG.

Arbeidsgeschikt (AG)

Un trahado cu dokter di control ta determina capacita pa traha, mester informa su dienst di e fecha cu e ta reanuda trabao. E dia cu e reanuda trabao, e trahado mester entrega e carchi di control na su hefe di trabao.

E trahado ta malo riba e dia cu ela keda declara AG

Den caso cu un trahado ta sinti su mes malo ainda of atrobe riba e dia cu e ta declara AG, e mester yama SVb na su oficina di control entre 7:00 AM y 9:00 AM pa ricibi instruccion:

  • Si ta ricibi control medico na Playa ta yama: 527-2808 (SVb Eagle & Sun Plaza).
  • Si ta ricibi control medico na San Nicolas ta yama: 527-2790.

Si e dokter di control determina despues di control medico cu e trahado ta AG, e dia di AO no ta wordo aproba.

Bandona Aruba durante AO

E trahado cu dokter di control declara AO, no ta permiti pa bandona Aruba durante e dianan cu e ta AO sin aprobacion di SVb. Solamente esnan cu mester bay den exterior cu un declaracion di AZV por haya permiso di SVb pa bandona Aruba. Pa tur otro forma di tratamento of cualkier otro motibo, SVb no ta duna permiso.
Si e asegurado dicidi di bandona Aruba sin aprobacion, e ta perde su derecho riba compensacion durante e periodo cu e ta den exterior.

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of mediante e formulario aki.