fbpx

Seguro di Accident

Kico ta e seguro di accidente?

E seguro di accidente ta percura pa un trahado haya parti di su salario den caso cu e trahado no por traha pa motibo di un accidente di trabao.
Den caso cu un asigurado fayece a consecuencia di un accidente di trabao, e seguro di accidente ta regla e derechonan di su casa, yiu(nan) of di otro personanan cu ta depende di e difunto pa nan gastonan di mantencion.

Cual trahadonan ta cay bao e seguro di accidente?

Tur trahado den sector priva ta cay bao e seguro di accidente, cu excepcion di e siguiente categoria di trahado:

E siguiente categorianan di trahado no ta cay bao e seguro di accidente:

  • E doño di trabao cu ta traha pa su propio riesgo y cu ta ricibi pago.
  • E casa, yui(nan) of mayor(nan) di un doño di trabao cu ta traha den su propio compania y cu no ta ricibi pago of cu ta ricibi pago bao nivel di e sueldo minimo.
  • Personal domestico.
  • Capitan of navegante riba barco bao bandera di Aruba.
  • Empleadonan publico of empleadonan cu tin status legal igual na empleadonan publico.
  • Trahadonan cu ta traha na cas.

Kico ta un accidente di trabao?

Un accidente di trabao ta un accidente cu ta sosode durante trabao, y ta relaciona cu ehecucion di e trabao, cu consecuencia cu e trahado ta keda incapacita pa traha.
Tambe ta considera como accidente di trabao, un accidente cu tuma luga na caminda pa of for di trabao usando e caminda mas cortico, of un malesa cu ta surgi despues di trabao cual ta relaciona cu ehecucion di trabao.

Cuanto e compensacion ta pa dianan di AO?

Desde e di dos dia cu e trahado a notifica SVb cu e ta incapacita pa traha pa motibo di accidente di trabao, e tin derecho riba compensacion. Tur trahado ta ricibi 100% di su salario den e prome aña di incapacidad pa traha pa motibo di accidente di trabao.
Despues di e prome aña, e compensacion ta bira 80% di e salario. Si e trahado ta keda incapacita permanente, SVb ta determina e nivel di incapacidad di e trahado. Despues e lo ricibi un porcentahe di su salario a base di e nivel di su incapacidad.

Cu cual rekisitonan e trahado mester cumpli pa por ricibi compensacion?

Pa por ricibi e benificionan e doño di trabao ta obliga di inscribi su trahado na SVb como asegurado. Pa un doño di trabao por ricibi compensacion pa accidente di trabao di su trahado, e mester entrega un bedrijfsongevallenformulier dentro di 1 aña via e portal di MiSVb (lesa mas akinan).
E trahado cu a haya un accident a consecuencia di un conducta prohibi, un acto intencional of descuido serio di e trahado, no por bin na remarca pa ricibi compensacion.

Con ta ricibi compensacion di SVb?

SVb ta duna compensacion pa seguro di malesa y accident despues cu a ricibi peticion pa cu esaki via e portal di MiSVb. Peticionnan pa pago di ZUK cu a ser entrega prome cu dia 20 di e luna coriente, ta wordo paga riba dia 5 di e siguiente luna.

Cuanto e prima ta pa e seguro di accidente?

E prima di seguro di accidente ta entre 0.25% y 2.5% di e salario bruto di e trahado. E porcentahe aki ta depende di e nivel di peliger di e trabao. Despues di un evaluacion di e grado di peliger SVb ta stipula e porcentahe cual ta mara na e trabao. E prima aki ta pa e doño di trabao.
Ta contra ley pa e trahado paga e prima, of pa e suma wordo reduci for di su salario.

Lesa mas riba e gevarenklasse aki.

Fayecimento di Asegurado

Den caso cu un asegurado fayece, SVb ta rekiri pa wordo informa di esaki dentro di 30 dia despues di e fayecemento. Esaki pa preveni cu na prome instante primanan ta wordo cobra dimas na e empresa; tambe si tabata AO cu lo mester paga bek compensacion di ziekengeld cu a ricibi dimas.

Pa haci esaki por manda un email cu e siguiente informacion di e fayecido na medisch@svbaruba.org:

  • Nomber(nan) y fam (fam di soltera) ful
  • Fecha di nacemento
  • Fecha di fayecemento
  • Empresa(nan) unda ta inscribi
  • Overlijdensakte/ Certificado di defuncion

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of mediante e formulario aki.