Pensioen di Viuda
Kico ta e pensioen di viudo y viuda (AWW)?
E Ley di Seguro di Viudo y Huerfano (Algemene Wezen- en Weduwen-verzekering of AWW) ta un seguro pa tur persona cual ta cubri e consecuencianan financiero di fayecimento di un casa cual ta un asegurado. Esaki ta nifica cu na momento cu un persona bira un viuda of viudo e ta eligibel pa ricibi un pensioen na acuerdo cu e ley di AWW.
Pa ken e pensioen di viuda of viudo ta?
E pensioen di viuda of viudo ta pa tur persona cual su esposa of esposo a fayece. E seguro ta cubri tur pareha casa te na e edad di pensioen.
Na momento cu un viudo of viuda yega e edad di pensioen, e pensioen di viudo ta caduca, y e viuda of viudo ta bin na remarca pa ricibi un pensioen di biehes. E persona cu ta ricibi un pensioen di viudo no ta ricibi e pensioen di biehes automaticamente ora e yega e edad di pensioen. E mester aplica na SVb di nobo pa ricibi e pensioen di biehes.
Tambe den caso cu un viudo of viuda casa di nobo e pensioen di viudo ta caduca.
Cuanto e pensioen di viuda of viudo ta?
E edad y suma di pensioen pa viuda of viudo ta:
-
- Te cu 39 aña: Afl. 574,- pa luna.
- Di 40 te cu 48 aña: Afl. 770,- pa luna.
Entrante 1 di januari 2015 e edad di pensioen di viuda y viudo a cambia. Durante un periodo di 10 aña, cada aña e edad ta subi cu un mey aña pa esnan cu edad di 58 of mas. Por mira esaki riba e siguiente tabel:
| Entrante | Edad pa Afl. 972,- pa luna | Edad pa Afl. 1.265,- pa luna |
| 1 januari 2015 | 49 te 58,5 aña | 58,5 te 60,5 aña |
| 1 januari 2016 | 49 te 59 aña | 59 te 61 aña |
| 1 januari 2017 | 49 te 59,5 aña | 59,5 te 61,5 aña |
| 1 januari 2018 | 49 te 60 aña | 60 te 62 aña |
| 1 januari 2019 | 49 te 60,5 aña | 60,5 te 62,5 aña |
| 1 januari 2020 | 49 te 61 aña | 61 te 63 aña |
| 1 januari 2021 | 49 te 61,5 aña | 61,5 te 63,5 aña |
| 1 januari 2022 | 49 te 62 aña | 62 te 64 aña |
| 1 januari 2023 | 49 te 62,5 aña | 62,5 te 64,5 aña |
| 1 januari 2024 | 49 te 63 aña | 63 te 65 aña |
Si un viudo of viuda tin yiu(nan) cu ta bayendo school, e viudo of viuda ta ricibi e suma di Afl. 1.265,- pa luna te ora e yiunan yega e edad di 25 aña, te ora e viuda of viudo casa bek di nobo, of te ora nan stop di atende school.
E sumanan aki no ta inclui e reparatietoeslag.
Reparatietoeslag
E reparatietoeslag ta un compensacion cu Gobierno di Aruba ta otorga, mediante SVb, na e pensionado. E reparatietoeslag no ta forma parti di e pensioen di AOV.
Gobierno di Aruba a tuma e desicion cu tur persona cu ta:
- inscribi na Registro Civil di Aruba;
- ricibi un pensioen di AOV/AWW mediante SVb Aruba;
ta ricibi e reparatietoeslag di Afl. 170,- pa luna.
Con un viuda of viudo por aplica pa ricibi pensioen di viudo?
Pa haci e aplicacion e viuda of viudo mester aplica via e portal di SVb Pensioen. Habri https://pensioenen.svbaruba.org y sigui e siguiente stapnan:
- Registra como usuario nobo: siguie e procedura pa crea un cuenta nobo pa e portal di MiPensioen. Tene cuenta cu mester tin un email valido. E password mester tin 6 caracter of mas, y mester tin por lo menos:
- un mayusculo (A-Z)
- un minisculo (a-z)
- un number (0-9)
- un caracter special, por ehempel : (!@#$%*?)
- Ora di a finalisa e registracion e sistema ta manda un email pa confirma. Controla si esaki no a drenta den e spam of junk folder.
- Despues cu a confirma e cuenta por login cu e username y password cu a yena anterior.
- Den e menu principal ta haya e opcion pa yena un peticion nobo. Sigui cu e procedura akinan.
Pa completa e peticion mester tin e siguiente documentonan digital:
- Un paspoort, rijbewijs of cedula valido di e aplicante.
- E acto di fayecimento.
- Un documento oficial cu e number di cuenta di banco.
Video di Instruccion Viuda y Viudo:
https://youtu.be/i6knycMDwEg
Rekisito adicional pa esnan cu ta biba afo
Si e persona cu ta aplica pa e pensioen di viudo no ta biba na Aruba of Hulanda, e ta obliga pa duna SVb un attestatie de vita (prueba na escrito cu e persona indica ta na bida) na momento di aplicacion.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 pa 6 luna. SVb no ta acepta copia di e attestatie di vita. Esnan cu ta biba afo por manda/entrega e attestatie de vita na:
- Den cierto caso na SVb di ex-Antias Hulandes.
- Den cierto caso na un embahada Hulandes.
E attestatie de vita ta obtenibel na oficina di gobierno of cerca un abogado of notario.
Cambio personal
Den caso di cambio den e situacion personal di e viuda of viudo e ta obliga pa notifica SVb di esaki dentro di 2 siman en escrito. Esaki entre otro ta den caso di:
- Cambio di dato personal (adres, number di telefon, cuenta di banco).
- Den caso cu e viuda of viudo bay biba afo di Aruba of reestablece na Aruba.
- Den caso cu un viudo of viuda casa.
- Den caso e yiu(nan) di un viudo of viuda no ta atende school mas.
Den caso cu tin cambio den e situacion personal, esaki por tin consecuencia pa e suma di pensioen. E viuda of viudo tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di demanda bek e sumanan aki.
Terminacion di pensioen
E pensioen di viuda of viudo ta wordo termina bao e siguiente circumstancianan:
- Na momento cu e viuda of viudo casa di nobo.
- Na momento cu e viuda of viudo yega e edad di pensioen. E viuda of viudo mester aplica cerca SVb pa ricibi un pensioen di biehes ora e ta bay yega edad di pensioen.
Mas informacion
Pa mas informacion por tuma contacto cu Departamento di Pensioenen:
- via Whatsapp 527-2760 (solamente mensahe, no por ricibi yamada)
- via email pensioenen@svbaruba.org
- via telefon 527-2760
- via e formulario di contacto
Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.
