Introduccion Calculator di Salario Diario
SVb Aruba ta orguyoso di presenta nos Calculator di Salario Diario nob, awor disponibel riba nos website:
https://www.svbaruba.org/dono-di-trabao/calculator-di-salario-diario/
Nos Calculator di Salario Diario ta un instrumento inovativo cual por calcula bo salario diario for di un salario pa ora, diario, semanal, mensual y anual. E ta tene na cuenta e diferente componente adicional cu un salario por tin, manera diferente toelage, comision, bonus y cualkier otro posibel salario adicional, y ta inclui tur esaki den e calculacion.
Nos Calculator di Salario Diario ta facil pa uza y lo yuda pa haci un calculacion corecto di e salario diario di empleadonan. Asina por controla, corigi of registra e salario diario corecto den MiSVb.
Yena solamente e suma di salario, e frecuencia di pago, e cantidad di dia y ora pa siman. E calculator lo genera e suma di e salario diario. Por pone acerca tambe componente di salario adicional pa calcula e salario diario total. Si ta desea por ricibi e calculacion haci tambe riba bo email via e calculator. Tene cuenta cu e uzo corecto di komma pa decimal y no uza punto, manera indica riba e calculator.
Cualkier informacion yena riba e Calculator di Salario Diario NO ta wordo warda riba nos website, ta wordo delete automaticamente.
Den caso cu tin algun pregunta of comentario, por fabor tuma contacta cu departamento di Premieheffing via:
- Mail heffing@svbaruba.org
- Whatsapp (message only – no calls) +2975272740
- Telefon 527-2700 (Pidi pa comunica cu Afdeling Premieheffing)
Importacion Automatico pa Cambio den MiSVb
Recien a haci posibel e opcion pa MiSVb acepta importacion di cambionan for di paketenan di Payroll Pro y Celery. Cu e importacion aki no tin nodo di haci e cambionan aki manual den MiSVb, sino por export un documento for di un di e paketenan aki y importa e cambionan automatico den MiSVb. Esaki ta haci e proceso di cambionan di salario mas confiabel y sigur pa ehecuta na un manera hopi facil.
Pa un splicacion con pa haci esaki por consulta e manual aki: Manual Importacion Automatico MiSVb Jan 2023 (pdf)
Den caso cu ta desea asistencia por tuma contacto cu nos MiSVb Helpdesk via mail heffing@svbaruba.org. Tambe por comunica cu nos Helpdesk via WhatsApp +2975272740 (por acepta solamente mensahe di Whatsapp, no yamada).
Aumento Pensioen di AOV y AWW entrante 1 januari 2023
SVb ta anuncia cu entrante prome di januari 2023 nos pensioen di AWW y AOV ta bay conoce un aumento di 5%. Ademas nos ta informa cu entrante prome di januari 2023 edad di pensioen ta subi cu 6 luna y ta bira 64,5 aña.
E suma di reparatietoeslag tambe ta wordo aumenta di Afl. 125,- pa Afl. 170,- entrante 1 januari 2023.
Ceramento di Oficinanan di SVb Durante Dianan di Fiesta
Durante temporada di fiesta tur sucursal di SVb ta cera riba e dianan menciona akibao. Servicio pa notifica AO ta limita riba e dianan aki.
- Diabierna 23 y diasabra 24 december:
- Por notifica AO na 527-2782 di 7:00 AM te cu 11:00 AM
- No por yama pa dokter di control
- Por notifica AO Online di 7:00 AM te cu 9:00 AM
- Diadomingo 25 y dialuna 26 december:
- No tin servicio di telefon
- Por notifica AO Online di 7:00 AM te cu 9:00 AM
- Diahuebs 29 december merdia desde 12:00 PM:
- Por notifica AO na 527-2782 di 7:00 AM te cu 12:00 PM
- Por notifica AO Online di 7:00 AM te cu 15:00 PM
- Diabierna 30 december y diasabra 31 december:
- Por notifica AO na 527-2782 di 7:00 AM te cu 11:00 AM
- No por yama pa dokter di control
- Por notifica AO Online di 7:00 AM te cu 9:00 AM
- Diadomingo 1 januari
- No tin servicio di telefon
- Por notifica AO Online di 7:00 AM te cu 9:00 AM
- Dialuna 2 januari
- Por notifica AO na 527-2782 di 7:00 AM te cu 11:00 AM
- No por yama pa dokter di control
- Por notifica AO Online di 7:00 AM te cu 9:00 AM
Prome cu por notificia AO Online mester traha un cuenta cual mester wordo confirma. Pa mas informacion y pa registra bishita nos website https://ao.svbaruba.org.
E ceramento no ta afecta e sistemanan riba website y portal di SVb.
Dia Mundial di Adulto Mayor
SVb Presente na Expo Promove Salud y Bienestar
Diasabra 24 di september ta dia di salud y bienestar. Nos di SVb ta invitabo pa topa cu nos na Expo Promove Salud y Bienestar. E Expo ta tuma luga na Centro Libertador Betico Croes, y ta habri di 10:00 AM pa 5:00 PM. Entrada ta gratis.
SVb y Cambio Maneho Covid-19
Riba 12 september 2022 Gobierno di Aruba a anuncia un cambio di maneho, cual ta encera cu no ta obligatorio mas na Aruba pa haci test di Covid-19. Tambe no ta obliga mas pa esnan infecta cu Covid-19 pa bay den cuarentena of isolacion.
E cambio aki ta encera cu SVb Aruba tambe ta adapta su maneho pa esnan cu ta infecta cu Covid-19.
- Ta atende infeccion cu Covid-19 manera cualkier malesa
- No por notifica AO pa bay haci test di Covid-19
- No por notifica AO pa bay den cuarentena of isolacion.
E cambio di maneho aki ta drenta na vigor inmediatamente pa tur esnan cu lo wordo infecta. Trahadonan cu a notifica AO caba pa motibo di Covid-19 no lo wordo afecta pa e cambio aki.
SVb ta introduci su Mobile App “MiPensioen”
Banco di Seguro Social SVb ta sigui inova su servicionan. Awor SVb ta ofrece na pensionadonan di AOV un servicio nobo cual ta facil pa uza riba celular of tablet. Dia prome di september nos Pensioen di Biehes esta nos AOV ta cumpli 62 aña. For di introducción di SVb Aruba na aña 1986 e desaroyo tecnologico tabata inmenso. Y ta cu satisfaccion cu un biaha mas ta marca un punto importante den e avancenan tecnologico y di digitalisacion.
“MiPensioen Mobile App”, ta na servicio di tur cliente cu ta cobra pensioen di biehes y cu ta registra den e portal di MiPensioen. Su uzo ta facil, mester log in cu e mesun usernanme y password cu ta uza riba e portal. Si e Pensionado no ta registra ainda riba e portal di “MiPensioen” por registra direct via di e app mes.
Segun e celular of tablet cu ta uza mester bay den Playstore of den Appstore, busca e app MiPensioen y download esaki. E usuario ta yena su username y password y despues ta crea su pin cu e lo keda uza cada biaha cu mester haci uzo di e app. Den e app aki ta haya documentonan manera Jaaropgaaf y Inkomensverklaring. Tambe por mira e pagonan cu a ricibi for di SVb y por comunica cu SVb su Departamento di Pensioen mandando un e-mail via di e app.
Pa e pensionado e mobile app aki ta pone e documentonan cu e mester den su planta di man.
Cu e inovacion aki SVb cada dia ta sigui contribui pa mehora e servicio pa nos clientenan.
Nos ta recorda tur pensionado di SVb cu pa cualkier informacion por yama telefon 527-2760 of email nos na pensioenen@svbaruba.org.
Maneho di Boet Administrativo
Na april di 2016 Parlamento di Aruba a pasa e ley den cual ta duna SVb autorisacion pa sanciona doño di trabao cu no ta cumpli cu inscripcion di nan trahadonan. Desde juli di 2017 e ley aki a drenta na vigor.
Cada doño di trabao tin obligacion pa cumpli cu nos leynan di Seguro di Malesa, Seguro di Accidente y Cesantia na momento cu tin trahado den servicio. Ta e responsabilidad di cada doño di trabao pa inscribi e trahado prome of riba e prome dia di trabao. Cada dia cu e trahado traha sin ta inscribi e doño di trabao ta falta di cumpli cu e leynan di SVb. Esnan cu no cumpli cu esaki ta ricibi un Boet Adminstrativo.
E Boet Adminstrativo tin 3 categoria:
- E doño di trabao no a duna informacion di trahado completo of corecto
- E doño di trabao no a inscribi trahado na tempo
- E doño di trabao nunca a inscribi trahado
Na momento cu SVb finalisa control y a keda comproba cu e doño di trabao no a cumpli cu ley, SVb ta manda un notificacion digital (via di e-mail) cu SVb tin intencion pa duna un Boet Administrativo. Den e notificacion SVb ta splica e motibonan pakico ta bay ricibi e boet, ademas ta informa riba e suma di boet. Ta importante pa menciona cu e boet ta pa cada trahado cu no a wordo inscribi of no a wordo inscribi debidamente. Por ehempel, den caso cu un empresa a comete un infraccion cu 6 trahado, SVb ta evalua cada trahado su situacion y lo impone un boet riba e doño di trabao pa cada trahado.
E doño di trabao tin posibilidad pa entrega un obhecion te cu 3 siman despues di fecha di e notificacion aki. E obhecion por wordo entrega riba nos website www.svbaruba.org/obhecion of mediante un carta dirigi na director di SVb :
ir. E.M. Jacobs
Caya Punta Brabo 19, Oranjestad.
Si dentro di 3 siman SVb no ricibi un obhecion automaticamente e doño di trabao ta acepta cu a falta di cumpli cu leynan di SVb.
E doño di trabao cu a ricibi un Boet Adminstrativo tin 6 siman pa cumpli cu e pago. Si tin dificultad pa cumpli cu e boet por tuma contacto cu SVb pa yega na un areglo di pago. Mester menciona cu si no cumpli dentro di 6 siman ademas no a tuma contacto cu SVb lo sigui cu e procedura di aanmaning, dwangschrift y beslag.
Por lesa mas tocante e maneho di Boet Administrativo riba nos website www.svbaruba.org/boet.
Schoolverklaring Pa Pensioen Di Huerfano
Tur huerfano entre 15 y 25 aña cu ta bay school den dia mester entrega e schoolverklaring pa e aña escolar 2022/2023.
Pa evita atraso den pago di pensioen di huerfano, e papelnan aki mester wordo entrega no mas tarda cu dia 15 di augustus 2022. Por mail esaki na SVb Departamento di Pensioen via email pensioenen@svbaruba.org.
SVb_Seguro_Huerfano