Pago di prima na SVb

Con e doño di trabao/compania por haci un pago na SVb?

Pago ta wordo haci riba cuenta di banco di SVb. Pagonan ta wordo haci riba e siguiente cuentanan di banco:

Prima Seguro di Malesa/Seguro di Accidente (ZV/OV)
Aruba Bank	19.22.616
RBC Bank	77 000 000 305 94 997
Banco di Caribe	801765.01
Caribbean Mercantile Bank	92 39 3106
Prima Cesantia
Aruba Bank	19.22.517
RBC Bank	77 000 000 126 02 435
Banco di Caribe	822014.01
Caribbean Mercantile Bank	90 27 3501
Loonsubsidie
Aruba Bank	60 16 39 0190

Nos ta recomenda pa specifica e werkgeverscode di e compania pa cual ta haci pago, tambe e tipo di prima pa cual ta haci pago, acompaña pa e temporada y aña di aanslag of si ta pa un areglo di pago.

Ken SVb ta considera responsabel pa e pagonan?

Si un compania of doño di trabao no cumpli cu su cuenta, of no paga un boet cu el a haya, e siguiente persona(nan) ta wordo poni responsabel pa e pago:
– Pa un doño di trabao cu ta haci negoshi for di Aruba esakinan por ta e bestuur di un N.V. of Stichting. Si tin mas cu un doño di trabao nan tur por wordo poni responsabel personalmente.
– Pa un doño di trabao cu no ta biba riba Aruba of cual no ta estableci na Aruba e siguiente por wordo poni responsabel:

• E persona cual ta dirigi e compania na Aruba.
• E persona cual ta representa e compania na Aruba.
• E persona cual ta dirigi e trabao na Aruba.

Kico ta e procedura di cobransa y pago?

Despues di inscripcion riba MiSVb e cobransa ta keda calcula a base di e salarionan di trahadonan cu ta inscribi na SVb bao nomber di e compania. Cada luna un cobransa nobo ta sali riba e portal di MiSVb.

Apelacion contra cobransa

Si un doño di trabao no ta di acuerdo cu e cobransa, e por entrega un apelacion dentro di 2 luna cerca e departamento di Premieheffing. Den e apelacion e doño di trabao ta expresa e motibonan pa cual e no ta di acuerdo cu e cobransa di SVb. Consecutivamente e doño di trabao por pidi un suspension di pago na departamento di Invordering. Pa por haya un suspension di pago mester entrega un copia cu stempel di e apelacion cerca departamento di Invordering.

Falta di Pago di Prima y Boet

Tur pago di prima di SVb mester keda cancela prome cu of riba e fecha di 15 di cada luna. Incumplimiento cu esaki tin como consecuencia cu SVb lo tuma paso pa cobra e primanan cu no ta paga. Gasto di e pasonan aki ta pa cuenta di e doño di trabao cu no a cumpli cu su deber di paga prima cu ta cubri e seguro di su trahado.
E siguiente pasonan lo wordo tuma te cu pago a wordo cumpli of a yega na un areglo:

1. Recordatorio (aanmaning)
2. Orden di ehecucion (dwangschrift betekend)
3. Embargo (beslaglegging)

Na momento cu no a cumpli cu pago completo of na tempo, conforme ley SVb ta autorisa di impone un boet. E boet aki tin un suma minimo y tambe un porcentahe minimo y maximo cu ta mara na e suma habri.

E maneho ta dicta cu:

• Pa cada cobransa (quota of premie-aanslag), e boet medio un aanmaning ta minimo 20% di e suma habri. Si e suma habri ta menos cu Afl. 100,- lo impone un solo boet di Afl. 100,-. E gasto di un aanmaning ta Afl. 10,-.
• Ta enforsa un sistema cumulativo unda pa cada siguiente aanmaning cu ta ricibi e boet ta subi cu 20%. Por haci esaki pa un maximo di 5 biaha, y por yega te cu un maximo di 100% di e cobransa habri.

Apelacion contra aanmaning

Si un doño di trabao no ta di acuerdo cu e aanmaning, e por entrega un apelacion contra esaki cerca e departamento di Invordering. Den e apelacion e doño di trabao ta expresa e motibonan pa cual e no ta di acuerdo cu e aanmaning di SVb.
Pa mas informacion tocante e suma habri of pa areglo di pago por tuma contacto cu Departamento di Invordering via e-mail invordering@svbaruba.org

Apelacion despues di a apela cerca SVb

Despues di a ricibi e decision di SVb tocante cobransa of aanmaning, e doño di trabao ainda por apela cerca Colegio di Apelacion dentro di 3 siman despues di a ricibi e decision di SVb en escrito. E apelacion por escrito ta keda dirigi na:
College van Beroep
Inzake (ZV, OV, AOV, AWW of Cesantia)
John G. Emanstraat 51
Oranjestad, Aruba

Procedura despues di a ricibi cobransa y aanmaning

Den caso cu e doño di trabao no por cumpli cu e pago e por yega na un areglo di pago cu SVb. Si e doño di trabao no cumpli cu su debernan y no yega na un areglo di pago e lo ricibi un dwangschrift despues di 30 dia cu a ricibi e aanmaning. Consecuentemente e doño di trabao lo ricibi un bevel pa cumpli cu e pago, entrega pa un deurwaarder; of pa presenta na departamento di Invordering dentro di 2 dia.
Den caso cu e doño di trabao ainda no reacciona riba e dwangschrift y bevel, e lo ricibi un beslaglegging of SVb ta pone un vordering aan derden.
Pa mas informacion tocante e suma habri of pa areglo di pago por tuma contacto cu Departamento di Invordering via e-mail invordering@svbaruba.org

Resumen di suma y tarifa SVb

https://www.svbaruba.org/dono-di-trabao/resumen-di-tarifa/

Mas informacion

Pa mas informacion por tuma contacto cu SVb na telefon 527 27 00, email na info@svbaruba.org of mediante e formulario aki.