SVb ta acerca servicio na pensionadonan cu apertura di kiosco na MFA Paradera

E apertura a tuma luga den presencia di prome minister Mike Eman, minister di Salubridad Publico, Asunto Social, Cuido di Adulto Mayor y Maneho di Adiccion Mervin Wyatt-Ras y director di SVb Edwin Jacobs.

E kiosk na Paradera ta sigui riba e experiencia di MFA Noord, caminda recientemente un servicio similar a habri. E iniciativa ta forma parti di e vision pa acerca servicio di SVb mas cerca di comunidad, combinando digitalisacion cu asistencia personal.

Durante e apertura, prome minister Eman a destaca cu digitalisacion ta trece hopi oportunidad y progreso, pero na mes momento ta importante pa tene cuenta cu ciudadanonan cu no ta igualmente familiarisa cu e mundo digital, particularmente algun adulto mayor.

E solucion ta precisamente pa acerca e servicio na bario y mantene posibilidad pa ciudadano papia personalmente cu un hende cu por guia y asisti nan. E kiosk na Paradera ta un siguiente paso den e direccion aki.

Minister Mervin Wyatt-Ras a destaca e importancia di un servicio accesibel pa adulto mayor. El a señala cu na MFA Paradera pensionadonan por haya informacion y asistencia, mientras personanan cu ta acercando edad di pension por orienta nan mes na tempo tocante nan derecho, nan pensioen y e pasonan necesario pa prepara nan retiro.

E ubicacion den MFA ta contribui tambe na un otro aspecto importante: acerca servicio publico na un luga familiar y accesibel den bario, caminda ciudadano por ricibi asistencia y, na mes momento, mantene contacto social cu otro.

Director di SVb Edwin Jacobs a indica cu e apertura na Paradera ta special, entre otro pasobra SVb ta hibando actividadnan relaciona cu pensioen mas cerca di comunidad. E interes tabata grandi: den corto tempo alrededor di 65 persona ya a registra, mientras SVb tabata spera alrededor di 250 pensionado y futuro pensionado durante e actividad.

Jacobs a enfatisa cu servicio digital ta un parti importante di modernisacion di SVb, pero cu contacto personal ta sigui ta necesario pa mantene siguridad social inclusivo y accesibel pa tur ciudadano.

Na MFA Paradera, ademas di e portal digital, un empleado di SVb lo ta presente un biaha pa siman pa atende publico, brinda informacion y yuda ciudadano cu uzo di e servicionan disponibel.

Despues di MFA Noord y awor Paradera, e intencion ta pa e concepto sigui amplia den otro distritonan. Segun Jacobs, Santa Cruz ta siguiente riba lista, sigui pa Savaneta, y na su momento MFA San Nicolas, ampliando gradualmente e presencia di SVb den comunidad.

Cu e apertura na MFA Paradera, Gobierno y SVb ta sigui duna contenido na e meta pa trece servicio publico mas cerca di pueblo, mientras digitalisacion ta bay man den man cu atencion personal pa esnan cu mas tin mester di dje.