Lansamento di MiSVb Trahado Mobile App Ta Empodera Empleadonan den Sector Priva di Aruba

SVb Aruba ta hopi entusiasma pa anuncia e lansamento di su MiSVb Trahado Mobile App, specificamente diseña pa empleadonan den sector priva. E app aki, cu ta gratis y disponibel entrante awe, ta representa un paso grandi y importante pa duna e trahado e posibilidad pa yega na su propio informacion na un manera conveniente y cu seguridad.

Informacion Personal den Plant’I Man

Cu e MiSVb Trahado App e trahado por yega na su informacion personal cual ta registra cerca SVb Aruba, asegurando transparencia y un miho control riba nan informacion. Banda di e informacion personal tambe por wak e historia laboral cu ta registra na SVb. Den e App e trahado tambe por habri su informacion laboral manera e cantidad di oranan di trabao pa cual ta segura ademas e salario diario.
Na un manera mas facil por habri y download e documento di registracion di SVb, hacienda cierto proceduranan administrativo mas facil y liher.

Funcionalidad pa Notifica na AO

Cu e app tambe e trahado por notifica AO (meld ziek), simplificando e procedura di notifica AO mientras ta percura pa comunicacion mas eficiente pa e doño di trabao. Trahadonan cu ta notifica AO vi e App ta wordo informa di cada stap den e proceso, ademas e doño di trabao tambe ta ricibi notificacion riba e status di AO di su empleado. Ta bon pa remarca cu e doño di trabao ta wordo informa solamente di e fechanan di e AO y ningun informacion medico ta wordo comparti cu e doño di trabao.

Cu e introduccion di e App nos portal di AO Online lo wordo cera tambe entrante awe 3:00 PM. Notificacionnan cu a wordo haci caba riba e portal di AO Online lo sigui wordo administra riba e mesun portal, pero despues di awe por notifica AO solamente via e App of via telefon.

Con Pa Uza MiSVb Trahado Mobile App:

MiSVb Trahado Mobile App ta disponibel pa download gratis riba plataformanan di Google Android y Apple iOS.Usuarionan por haya e App den e respectivo tienda digital di app buscando “MiSVb Trahado”. Pa ayudo cu e App nos a institui un Helpdesk MiSVb Trahado, cu ta disponibel pa duna asistencia cu cualkier problema cu por surgi cu uzo di e App. Por tuma contacto cu e helpdesk via:

• Whatsapp +297 527 2727 (solamente mensahe – no por ricibi yamada)
• Email misvbtrahado@svbaruba.org
• Website: svbaruba.org/misvbtrahado

Inovacion pa un Futuro Digital:

E MiSVb Trahado Mobile App ta refleha e compromiso cu SVb Aruba tin cu inovacion y su transformacion digital. Cu introduccion di e App SVb Aruba ta sigui pone enfasis pa mehora e bienestar general di Aruba, brindando su clientenan servicio eficiente cu hermentnan pa yega na nan informacion relaciona cu su empleo. Cu introduccion di e App aki SVb ta sigui carga su responsabilidad pa sigui inova y mehora e servicio pa nos clientenan. Cu hopi entusiasmo nos ta yama un bon bini na e impacto positivo cu e MiSVb Trahado Mobile App lo trece pa nos forsa laboral.

 

Mas informacion
Pa mas informacion por tum contacto cu SVb Aruba via info@svbaruba.org. Por habri nos pagina special pa MiSVb Trahado Mobile App akinan:
https://www.svbaruba.org/misvbtrahado.