fbpx

Subsidio di Salario – November 2020

E periodo di aplicacion pa e programa di subsidio di salario pa luna di november ta cuminsa diaranson, 18 di november, 2020 pa 9 ‘or di mainta y ta caba diaranson, 25 di november, 2020 na fin di dia (11:59 PM). Tur dunado di trabou cu ta bin na remarke pa aplica pa subsidio di salario a ricibi un notificacion di SVb. E luna aki SVb ta manda tur dia un tip informativo pa e dunado di trabou pa yuda cu e proceso di aplicacion. Asina ta, corda check bo mailbox (incluyendo bo junk/ spam folder).

Tur rekisito pa subsidio di salario a keda mescos pa luna di november:

  1. E compania a wordo afecta den un forma negativo pa motibo di COVID-19;
  2. E compania tin un perdida di entrada premira di por lo menos 25% den e luna di e subsidio;
  3. E compania no ta permiti pa retira empleado pa motibonan socio-economico;
  4. E compania ta paga e empleado minimal 60% di su salario;
  5. E compania y tur empleado ta registra na SVb riba 15 di maart 2020;
  6. E compania ta registra na Departamento di Impuesto y tin un persoonsnummer;
  7. E compania ta cumpli cu pago di impuesto y primanan social di e luna corespondiente cu a aplica pa subsidio;
  8. E compania mester aplica pa e subsidio;
  9. E compania a cumbini cu tur trahado un reduccion di arbeidsomvang cu por varia entre 0% te cu maximal 40%.

SVb ta recorda tur dunado di trabou cu pa aplica pa subsidio di salario pa luna di november e dunado di trabou mester a cumpli cu e pago di tur prima y seguro social pa luna di mei te cu oktober. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa paga e primanan aki.

SVb un biaha mas ta pidi tur dunado di trabou pa tuma nan tempo y lesa e notificacion, y especialmente e checklist, bon prome cu bay aplica pa evita cu ta entrega cos robes of incompleto. Despues di a entrega e aplicacion e dunado di trabou no por haci cambio mas.

Pago di subsidio di salario pa luna di november di parti di SVb pa e dunado di trabou ta wordo ehecuta diariamente segun cu e aplicacion di e compania keda aproba. Dunado di trabou ta responsabel pa verifica cu su cuenta di banco y tur salario di su trahadonan ta corectamente registra na SVb.

Bo tin pregunta?

Mail nos Service Center na loonsubsidie@svbaruba.org.

Bo kier lesa mas tocante e programa di Subsidio di Salario?

Bay na e Tab Doño di Trabao ariba nos pagina principal y click ariba Subsidio di Salario.

Posted by