Subsidio di Salario

KICO TA SUBSIDIO DI SALARIO?

Subsidio di Salario ta un sosten financiero pa empresanan local cu a consecuencia di e situacion actual causa pa e pandemia COVID-19 ta sufri un perdida di entrada di benta di por lo menos 25%. E meta principal di e programa di Subsidio di Salario ta pa mantene mas trahado cu ta posibel den servicio maske cu tin menos (of no tin) actividad economico y pa garantisa pago parcial di salario di e trahado (Decreto Ministerial, 13 di mei, 2020, Minister di Finansa, Asuntonan Economico y Cultura).

Por wak tur video cu splicacion riba e Subsidio di Salario akinan: https://www.svbaruba.org/video-subsidio-di-salario/

E Subsidio di Salario ta consisti di dos parti:
● 60% di e SVb-loon riba 15 di maart 2020 te cu e SVb-loongrens (Afl. 5.850) pa haci posibel cu e dunado di trabou por sigui paga por lo menos e parti ey como salario bruto na e trahado; y
● 11.6% di e SVb-loon menciona te cu e SVb-loongrens (Afl. 5.850) como compensacion parcial di e resto di gastonan di salario di e dunado di trabou (incluyendo primanan di e dunado di trabou).
E porcentahenan menciona ta wordo multiplica cu e porcentahe di perdida di entrada di benta.
Por lo tanto e total di e Subsidio di Salario ta maximal Afl. 4.188,60 (71.6% di e SVb-loon Afl. 5.850).

E suma exacto di e subsidio ta wordo calcula a base di e decision aproba di Conseho di Minister di Reino riba peticion di Gobierno di Aruba cu ta basa ariba e siguiente puntonan:
● e base ta e total di e SVb-lonen di e trahadonan registra na SVb te cu e SVb-loongrens (Afl. 5.850);
● esaki ta wordo multiplica cu 71.6%;
● y despues ta multiplica esaki cu e porcentahe di perdida di benta premira den e luna respectivo.
E porcentahe di perdida di entrada di benta premira ta e entrada di benta premira pa e luna en cuestion na 2020 compara cu e entrada di benta actual di e mesun luna ey na 2019.

E dunado di trabou mester, manera ya caba indica, sigui paga un salario bruto di por lo menos 60% di e SVb-loon di e trahado, te cu e SVb-loongrens (Afl. 5.850) na e trahado. Esaki ta implica cu e reduccion di ora di trabou (arbeidstijdverkorting – ATV) ta maximal 40%.

Di e salario bruto di e trahado mester retene – ademas di e parti di e trahado pa cu prima di pensioen general – loonbelasting y e parti di e trahado pa cu e primanan social. Esakinan ta wordo cubri (te cu 60% di e SVb-loon) door di e Subsidio di Salario. Hunto cu e parti di e dunado di trabou pa cu e primanan social (parcialmente cubri door di e Subsidio di Salario) esakinan mester wordo declara y paga manera custumber na Departamento di Impuesto y SVb prome cu dia 15 di e siguiente luna.

EHEMPEL

Pa asisti e dunado di trabou cu e decision si ta acepta e Subsidio di Salario a traha un tabel. E tabel ta duna varios ehempel na diferente nivel di salario, porcentahenan di perdida di entrada di benta premira y e efectonan di esaki riba dunado di trabou y e trahado.

NOTA: E ehempelnan ta indicativo so. Ningun derecho por wordo deriva di e informacion presenta den e tabel.

Notificacion importante pa tur dunado di trabou: Subsidio di Salario ta inclui e primanan social. Consecuentemente e dunado di trabou no por aplica e descuento ariba e primanan social di e dunado di trabou basa ariba e Plan di Alivio Fiscal di Departamento di Impuesto.

REKISITIONAN PA SUBSIDIO DI SALARIO

Companianan cu no wordo categorisa como empresa menos vulnerabel mester cumpli cu e siguente rekisitonan pa por tin derecho ariba e Subsidio di Salario,:
1. E compania a experiencia consecuencianan negativo door di COVID-19 y ta premira un perdida di entrada di benta di por lo menos 25% den e luna pa cual ta aplica pa e Subsidio di Salario;
2. E compania no mag retira trahado pa motibonan socio-economico;
3. E compania ta paga un salario bruto di minimal 60% di e SVb-loon na e trahado;
4. E compania y tur trahado tabata registra na SVb dia 15 di maart, 2020;
5. E compania ta registra na Departamento di Impuesto y tin un persoonsnummer;
6. E compania ta cumpli cu tur deber relaciona cu pago di impuesto y primanan pa e luna pa cual ta aplica pa Subsidio di Salario;
7. E compania ta entrega e aplicacion pa Subsidio di Salario na tempo.

Dunadonan di trabou cu den april a aplica (sea parcial of por completo) “no work, no pay” loke a haci cu su trahadonan kisas a aplica pa un pago di e fondo di emergencia (FASE), por resumi pago di salario den luna di mei (di acuerdo cu e di tres rekisito) pa bin na remarke pa e Subsidio di Salario.

ADELANTO

Pa facilita e dunado di trabou y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou. Despues lo controla y fiha e suma di subsidio a base di entrada real di e dunado di trabou den e lunanan cu e dunado di trabou a ricibi e adelanto di e Subsidio di Salario.

E Subsidio di Salario ta un subsidio y no un fiansa, e dunado di trabou no mester paga esaki bek. Si lo haci ahustenan necesario na e suma final di subsidio a base di e entrada di benta real y otro informacion financiero di e dunado di trabou.

APLICACION

E Subsidio di Salario ta wordo paga pa luna. Cada luna cu por aplica pa Subsidio di Salario e dunado di trabou lo ricibi un notificacion via e-mail di SVb. Despues di ricibi e notificacion e dunado di trabou tin un cierto cantidad di dia cu e por yena e formulario di aplicacion. Pa yena e formulario di aplicacion e dunado di trabou mester drenta den su portal digital di MiSVb (https://misvb.svbaruba.org). Pa drenta e dunado di trabou ta ingresa su credencial. Ora cu e dunado di trabou ta den su portal e ta bay wak e formulario di aplicacion pa Subsidio di Salario pa e luna en cuestion. E formulario di aplicacion ta den e portal di e dunado di trabou mientras e periodo di aplicacion ta habri. Na momento cu e fecha pasa, e formulario di aplicacion no lo ta disponibel mas riba e dunado di trabou su MiSVb.

E dunado di trabou mester yena e formulario completo y despues e ta primi ariba e boton “Entrega Peticion”. E dunado lo ricibi un confirmacion cu e peticion a keda entrega.

Despues cu e dunado di trabou a yena e formulario di aplicacion y a entrega e peticion, NO ta posibel pa haci cambio mas na e formulario di aplicacion.

PERDIDA ENTRADA DI BENTA PREMIRA

Ariba e formulario di aplicacion e dunado di trabou mester yena un porcentahe di perdida di entrada di benta premira pa e luna cu e dunado di trabou ta aplica pa Subsidio di Salario. Pa yega na e porcentahe aki e dunado di trabou mester haci lo siguiente. E dunado di trabou ta bay wak bek kico e dunado di trabou su entrada di benta real tabata den e aña anterior. Despues e dunado di trabou mester haci un estimacion (schatting) di e entrada di benta cu e dunado di trabou ta premira di bay tin na e mesun luna den 2020. E diferencia entre 2019 y 2020 den porcentahe ta bira e dunado di trabou su perdida di entrada di benta premira cu mester yena ariba e formulario di aplicacion.

Un ehempel simplifica pa luna di mei pa ilustra. Compania X ta premira cu na luna di mei 2020 e ta bay tin 70% menos na entrada di benta paso na mei 2019 su entrada di benta tabata AFl. 10.000 y pa luna di mei 2020 e ta premira cu e lo tin na entrada di benta AFl.3.000. E diferencia entre e dos sumanan ey ta 70%. E procentahe ey ta bira loke e dunado di trabou ta yena ariba e formulario di aplicacion.

INFORMACION DI COMPANIA

SVb tey pa asisti e dunado di trabou. Pero pa SVb por haci esaki na e miho manera posibel e ta hopi importante pa e dunado di trabou di su parti percura pa tur su informacion ta corectamente registra na SVb.

Informacion importante pa verifica:

  • E-mail di contacto – SVb ta manda tur notificacion di Subsidio di Salario pa e e-mail cu e dunado di trabou tin registra na SVb y pesey ta importante esaki ta e e-mail corecto di e compania
  • Informacion di trahado – tur informacion di trahado mester ta recien y corecto
  • Informacion di banco – e cuenta di banco mester ta e cuenta di banco di e compania y mester ta semper corecto y completo pa evita problema ora di haci pago

KEHO/ OBHECION

Si un dunado di trabou no ta di acuerdo cu un decision tuma pa SVb relaciona cu Subsidio di Salario e tin e posibilidad pa manda su keho na bezwaarloonsubsidie@svbaruba.org. E dunado di trabou mester menciona den su keho e nomber completo di compania, number di SVb y un descripcion amplio y detaya di e keho. Kehonan cu no ta completo no lo wordo evalua.

Den caso cu e dunado di trabou no ta bin na remarca pa ricibi Subsidio di Salario y a wordo informa di esey por medio di un notificacion oficial di SVb, dunado di trabou tin te 6 siman despues di a ricibi e notificacion di SVb pa entrega un obhecion na bezwaarloonsubsidie@svbaruba.org. E obhecion mester contene e nomber di compania, number di SVb, number di e decision di SVb contra cua e tin obhecion y un descripcion amplio y detaya dicon e no ta di acuerdo cu e decision di SVb. Obhecionnan cu no ta completo no lo wordo evalua.

SUBSIDIO DI SALARIO Y E TRAHADO

Un dunado di trabou cu a ricibi Subsidio di Salario mester usa e fondonan pa paga su trahadonan. E calculacion di e suma na Subsidio di Salario ta a base di e informacion cu e dunado di trabou tin registra pa e trahado na SVb dia 15 di maart, 2020. E trahado tin e derecho di pidi su dunado di trabou pa wak cuanto e dunado di trabou a ricibi na Subsidio di Salario pa su persona.

Gobierno lo duna dunado di trabou, depende di su perdida di entrada, subsidio pa paga e trahado te cu un maximo di 60% di salario registra na SVb te cu e limite di salario maximo di SVb cu ta Afl. 5.850,- pa luna.

Den caso cu dunado di trabou no por paga su parti di salario e dunador di trabao mester jega na un acuerdo cu su trahado riba e 40% di salario trahando menos ora (‘arbeidstijdverkorting’). Pues punto di bista ta cu trahado ta traha e candidad di ora segun e salario cu e ta ricibi, a menos cu partidonan a cumbini algo otro (for di e pagina di Departamento di Labor).

Un trahado no por ricibi pago di FASE y Subsidio di Salario. Si e ta ricibi FASE e no por haya pago di salario por medio di Subsidio di Salario y vice versa.

Ariba e pagina di Departamento di Labor tin mas informacion di Subsidio di Salario y e trahado (www.daoaruba.com).

PREGUNTA

Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario a bin cu un Service Center. E Service Center a compila un lista di preguntanan frecuente relaciona cu e topico Subsidio di Salario cu ta sigui aki bou.

E dunado di trabou mester paga e Subsidio di Salario bek?

Subsidio di Salario ta un subsidio, no un fiansa. No mester paga esaki bek. E Subsidio di Salario ta wordo paga na e compania den forma di un adelanto (un voorschot) a base di e perdida di entrada di benta premira. Despues ta bay wak a base di e compania su declaracionnan di impuesto y otro datonan financiero kico e perdida di entrada di benta real tabata y lo haci ahustenan necesario.

Con un compania por premira e perdida di entrada di benta?

E compania mester haci un inschatting di esaki. Un ehempel pa luna di juni 2020. E compania mester wak kico e tabata tin na entrada di benta na juni 2019. Despues e ta bay schat in (premira) kico e ta pensa di bay tin na entrada di benta na juni 2020. E diferencia entre juni 2019 y juni 2020 den porcentahe ta bira e dunado di trabou su perdida di entrada di benta premira.

Ki dia ta paga e Subsidio di Salario?

E transferencia di e pago di Subsidio di Salario ta wordo haci door di SVb mas tarda riba e di 15 dia di e luna. E compania lo ricibi un confirmacion na momento cu e transferencia a tuma luga. Tene na cuenta cu e Subsidio di Salario ta wordo transferi door di SVb ariba e cuenta di banco cu tin registra na SVb. Ta hopi importante pa mantene e datonan di compania al dia.

Dicon mi compania no a ricibi e e-mail pa aplica pa ricibi Subsidio di Salario?

Tin compania cu ta wordo considera menos vulnerabel. E companianan aki a wordo notifica via e-mail cu nan no ta bin na remarke pa aplica pa ricibi Subsidio di Salario.

Con un trahado sa si e dunado di trabou a bin na remarca pa y a ricibi e Subsidio di Salario?

E trahado por puntra su dunado di trabou esaki. E dunado di trabou tin e deber di mustra – riba peticion di e trahado – e suma cu e a ricibi na subsidio pa e trahado (Decreto Ministerial, mei 13, 2020).

Si e trahado ta ricibi pago di FASE e lo ricibi pago via di su dunado di trabou tambe awor cu tin Subsidio di Salario?

E trahado por ricibi of pago via FASE of via Subsidio di Salario, no tur dos.

Con por calcula cuanto un compania ta bay ricibi na Subsidio di Salario?

Mas ariba den e seccion informativo tin un tabel cu algun ehempel pa ilustra con mester calcula e pago di salarionan, loonbelasting y e primanan.

E calculacion ta:

e total di e SVb-lonen di e trahadonan di e dunado di trabou registra na SVb te cu e SVb-loongrens (Afl. 5.850) X 71.6% X cu e porcentahe di perdida di benta premira den e luna respectivo.

E perdida di entrada di benta premira ta 50% y no 100%. E dunado di trabou mester paga e diferencia entre loke ta ricibi na Subsidio di Salario y e salario bruto di por lo menos 60% di e SVb-loon di e trahado?

Si, e dunado di trabou mester paga esaki pa asina e trahado por ricibi un salario bruto di por lo menos 60% di e SVb-loon.

Mester paga primanan social di e dunado di trabou riba e Subsidio di Salario?

Si, e Subsidio di Salario cu e dunado di trabou ta ricibi ta consisti di un componente (11.6%) como compensacion parcial di e resto di gastonan di salario di e dunado di trabou (incluyendo primanan di e dunado di trabou).

Esakinan mester wordo declara y paga manera custumber na Departamento di Impuesto y SVb prome cu dia 15 di e siguiente luna.

Si e dunado di trabou haya Subsidio di Salario ki efecto esaki ta bay tin ariba punto 2 di e Fiscaal Noodplan cu Departamento di Impuesto a publica poco tempo atras?

Subsidio di Salario ta inclui e primanan social. Consecuentemente e dunado di trabou no por aplica e descuento ariba e primanan social di e dunado di trabou basa ariba e Plan di Alivio Fiscal di Departamento di Impuesto.

Kico ta e diferencia entre FASE y Subsidio di Salario?

FASE ta un programa di sosten financiero dirigi ariba e trahado cu a perde trabou of cu oranan drasticamente reduci a consecuencia di e crisis. E Subsidio di Salario ta un sosten financiero dirigi riba e dunado di trabou cu e meta pa mantene cupo di trabou y garantisa pago parcial di e salario di e trahado.

Un ZZP’er ta bin na remarca pa Subidio di Salario?

No, un ZZP’er no ta bin na remarca pa Subsidio di Salario. ZZP’ers tambe lo ricibi un ayudo financiero di parti di Gobierno di Aruba si pero por medio di FASE. Riba e pagina di FASE tin mas informacion pa cu e sosten financiero aki (www.fasehelpdesk.com).

Unda ta haya e formulario di aplicacion pa Subsidio di Salario?

E dunado di trabou mester bay na e portal digital MiSVb y ingresa usando su credencial (nomber di usuario y password). Den su portal e dunado di trabou ta bay wak riba e prome dia di luna e formulario di aplicacion pa Subsidio di Salario. E dunado di trabou mester yena e formulario full y despues click ariba e boton ENTREGA PETICION.

Por haci cambio na e formulario di aplicacion despues cu a entrega esaki?

No por haci cambio na e formulario di aplicacion despues cu a yena esaki y primi ENTREGA PETICION.

Tur luna mester aplica di nobo pa Subsidio di Salario?

Pa cada luna cu por aplica pa Subsidio di Salario e dunado di trabou mester aplica door di yena e formulario di aplicacion despues di a ricibi e notificacion di SVb.

Un dunado di trabou por usa e Subsidio di Salario pa otro gasto di negoshi?

No, e Subsidio di Salario por wordo usa solamente pa paga e salario di trahadonan.

Un dunado di trabou ta obliga pa aplica pa Subsidio di Salario?

No, e dunado di trabou cu a ricibi un notificacion di SVb cu e por aplica pa Subsidio di Salario no ta obliga pa haci esaki. E dunado di trabou ta haci su calculacion y evaluacion di su caso y ta tuma un decision.

 

Kico un dunado di trabou mester haci si ela ricibi Subsidio di Salario pa un trahado cu no tey mas cu e compania?

Den e caso aki e dunado di trabou mester sigui e siguiente pasonan:

  1. Debolbe e suma di subsidio ricibi pa e trahado na cuenta 1922616 Ziekteverzekeringsfonds na Aruba Bank, mencionando e werkgeverscode y idnr di e trahado cu no tey mas cu e compania.
  2. Informa SVb mediante un email na ejacobs@svbaruba.org cu e ta debolbe e suma paga pa subsidio di e trahado mencionando su idnr.
  3. Bay na MiSVb y cera e relacion di trabao di e trahado en cuestion.

 

Si en caso bo pregunta no ta aparece den e lista di preguntanan frecuente, bo por tuma contacto cu e Service Center Subsidio di Salario via mail na loonsubsidie@svbaruba.org.