Notificacion di AO

Print Friendly

Notificacion di AO

Ora e trahado publico ta incapacita pa traha pa motibo di malesa of accidente (ora e ta arbeidsongeschikt of AO), e trahado mester notifica su chef van dienst. Desde 1 januari 2012 e unico manera corecto pa notifica AO ta via e sistema di Webportaal. Esaki ta nifica cu e trahado ta yama solamente su chef van dienst y no ta yama SVb pa notifica AO.

Orario pa notifica

E trahado semper ta notifica AO prome cu su orario di trabao.

Den caso cu e trahado bira malo na trabao of despues di orario trabao, pero prome cu e departamento ta habri pa tuma su yamada, e mester meld cerca su departamento mas pronto posibel.

Instruccion ora di notifica AO

Na momento cu e trahado publico notifica AO, e mester presenta pa control na SVb riba e siguiente dia. Esaki ta nifica cu riba e di dos dia di AO e mester controla na SVb. Excepcion riba esaki por ta den caso cu e trahado a haya un operacion of otro tratamento medico.

Si e trahado no cumpli cu e instruccionnan duna, e ta perde su derecho riba compensacion.

Control na cas

Durante e periodo di AO, e trahado ta keda cas. E ta permiti pa sali solamente pa atende dokter, botica, hospital, specialista of un otro luga similar.
Riba e prome dia di AO e trahado por ricibi bishita di un controlado di SVb. Den caso cu e trahado no ta na cas ora e controlado presenta, e controlado ta laga un carta atras pa e trahado. Den e carta e trahado ta wordo notifica cu e no tabata presente na cas durante control y cu e mester presenta na SVb inmediatamente of e siguiente dia.

Reanuda trabao

Na momento cu e trahado bay traha atrobe e ta notifica su chef van dienst di esaki.

Control medico na SVb

E trahado cu mester ricibi control medico ta presenta na SVb prome cu 9:00 am. E trahado ta identifica su mes cu un paspoort, rijbewijs of cedula valido y ta entrega su carchi di control na e loket di Administracion Medico pa ricibi un number. Durante e control, dokter di control ta determina si e trahado ta sigui cu AO, of e ta capacita pa traha.

Arbeidsongeschikt (AO)

Un trahado cu dokter di control ta declara AO, mester informa su doño di trabao di e fecha cu e mester presenta na SVb pa control atrobe. Tambe e mester entrega e carchi di control na su trabao pa asina traha copia di esaki.
Pa cu e siguiente control medico na SVb, e trahado mester presenta cu su carchi di control. Pa por tin un miho bista riba e estado di e trahado, dokter di control por pidi e trahado informacion relaciona cu su medicamento. Tambe e dokter por pidi permiso di e trahado pa ricibi informacion di su dokter di cas of specialista.
Solamente e dokternan di SVb ta autorisa pa determina si un trahado ta AO of AG.

Arbeidsgeschikt (AG)

Un trahado cu dokter di control ta determina capacita pa traha, mester informa su dienst di e fecha cu e ta reanuda trabao. E dia cu e reanuda trabao, e trahado mester entrega e carchi di control na su hefe di trabao.

E trahado ta malo riba e dia cu ela keda declara AG

Den caso cu un trahado ta sinti su mes malo ainda of atrobe riba e dia cu ela keda declara AG, e mester presenta na SVb riba e mesun dia pa ricibi control medico.
Si e dokter di control determina cu e trahado ta AG, SVb no ta duna permiso pa compensa e dia aki.

Bandona Aruba durante AO

E trahado cu dokter di control declara AO, no ta permiti pa bandona Aruba durante e dianan cu e ta AO sin aprobacion di SVb. Solamente esnan cu mester bay den exterior cu un declaracion di AZV por haya permiso di SVb pa bandona Aruba. Pa tur otro forma di tratamento of cualkier otro motibo, SVb no ta duna permiso.
Si e asegurado dicidi di bandona Aruba sin aprobacion, e ta perde su derecho riba compensacion durante e periodo cu e ta den exterior.

Mas informacion

Pa mas informacion por tuma contacto cu SVb na telefon 527-2700, via email na info@svbaruba.org of medio e formulario aki.

Share

Comments are closed.