Inscripcion

Inscripcion pa ricibi beneficio

Pa un trahado por ricibi e beneficionan di e seguronan di trahado, ley ta stipula cu e mester inscribi su mes como asegurado na SVb. Sin inscripcion na SVb e trahado no tin derecho riba e beneficionan di e seguro di malesa y seguro di accidente. Si e trahado tin mas cu un doño di trabao e mester inscribi na SVb pa cada doño di trabao.

Inscripcion personal

Pa por inscribi na SVb e trahado mester presenta personalmente na SVb cu e siguiente documentonan:

Un cedula, paspoort of rijbewijs valido.
E formulario di inscripcion, yena y firma pa su doño di trabao. E formulario di inscripcion ta obtenibel na e doño di trabao.

Cambio den situacion laboral

Un trahado mester inscribi cerca SVb di nobo si e situacion laboral cambia, manera:

Si e trahado cambia di doño di trabao.
Si e trahado cuminsa traha bek pa e mesun doño di trabao.
Si e trahado wordo translada di un compania pa un otro compania cu ta cay bao di mesun consorcio.

Doño di trabao cu no ta coopera

For di momento cu un trahado drenta den servicio di un doño di trabao, e trahado tin e obligacion di ta sigura pa e seguronan di malesa y accidente. E obligacion pa ta sigura no ta depende di periodo di prueba, duracion di e trabao ni di e cantidad di oranan di trabao (part-time).
Den caso cu un doño di trabao no ta coopera pa e trahado inscribi como asegurado, SVb por intermedia den e asunto. Pa mas informacion tuma contacto cu departamento di Heffing na number di telefon 527 27 18.

Terminacion di seguro

E trahado su derecho riba beneficionan ta termina na momento cu e trahado no ta den servicio mas. E trahado por notifica SVb di esaki personalmente of e doño di trabao por haci esaki por escrito.