Pensioen di Biehes

Print PDF

Kico ta e pensioen di biehes (AOV)?

Pensioen di biehes (Algemene Ouderdomsverzekering of AOV) ta un seguro social pa cubri e consecuencianan financiero di biehes. E asegurado tin derecho riba pensioen entrante e luna despues di e fecha riba cual e pensionado a yega e edad di 60 aña.

Pa ken e pensioen di biehes ta?

Tur persona cu ta asegurado na Aruba pa e pensioen di biehes por aplica pa por ricibi e pensioen despues di a yega e edad di 60 aña. Pa ta un asegurado e persona mester a biba na Aruba entre e edad di 15 aña y 60 aña.

Cuanto e pensioen di biehes ta?

• Pa un pareha casa bibando hunto e pensioen di biehes ta maximo Afl. 1.780,- pa luna.
• Pa un soltera of soltero e pensioen di biehes ta maximo Afl. 1.057,- pa luna.
• Pa un persona casa cu no ta bibando hunto, of un persona no casa bibando hunto e pensioen di biehes ta maximo Afl. 890,- pa luna.

Cada aña e pensionado cu tin derecho riba pensioen durante luna di september ta ricibi un gratificacion di Pasco (Kerstbonus) den luna di december. E Kerstbonus ta 75% di e suma cual e pensionado ta ricibi durante luna di september, y ta wordo paga hunto cu e suma di december.
E sumanan aki ta conta pa aña 2011 y por wordo cambia pa ley.

Ki dia e pensioen di biehes ta wordo paga?

SVb ta paga e pensioen di biehes na cuminsamento di cada luna, pues cada luna SVb ta paga e pensioen adelanta. E fechanan di pago ta varia entre dia 2, 3 of 4 di cada luna.

Reduccion di pensioen

Pa un persona por ricibi e suma maximo di pensioen e mester ta biba na Aruba desde su edad di 15 aña te cu 60 aña. Pa cada aña cu un persona a biba afo desde su di 15 aña e suma di su pensioen ta wordo reduci cu un porcentahe entre 1% y 2.22%. E porcentahe ta depende di e temporada cu e persona a biba afo, e cantidad di e añanan cu ela a biba afo y su estado civil.

Con mi por aplica pa ricibi pensioen di biehes?

Pa un persona por ricibi e pensioen di biehes e mester aplica na SVb. Ta recomendabel pa presenta na SVb entre 3 pa 6 luna prome cu yega e edad di 60 aña. E persona cu ta aplica mester presenta cu e siguiente documentonan:

• Un paspoort, rijbewijs of cedula valido. Preferiblemente presenta cu e cedula pa SVb por tuma nota di e number di identificacion. Esaki ta acelera e proceso di control na censo.
• Un pasfoto recien.
• Un documento oficial cu e number di cuenta di banco.

E persona cu ta aplica pa pensioen despues di a cumpli 60 aña ta haya pensioen atrasa pa  no mas cu 1 aña prome cu e fecha di aplicacion.

Rekisito adicional pa esnan cu ta biba afo

Si e persona cu ta aplica pa pensioen no ta biba na Aruba of Hulanda, e ta obliga pa duna SVb un attestatie de vita (prueba en escrito cu e persona indica ta na bida). Den caso cu e persona ta casa y ta aplica pa ricibi e pensioen pa pareha casa, e mester presenta un attestatie de vita di su casa tambe.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 pa 6 luna. SVb no ta acepta copia di e attestatie di vita. Pensionadonan cu ta biba afo por entrega e attestatie de vita na:

• Den cierto caso na SVb di ex-Antias Hulandes.
• Den cierto caso na un embahada Hulandes.

E attestatie de vita ta obtenibel na oficina di gobierno of cerca un abogado of notario. Tambe si e pensionado ta na Aruba temporalmente e por pasa na SVb cu su paspoort, rijbewijs of cedula.

Cambio personal

Den caso di cambio den e situacion personal di e pensionado e ta obliga pa notifica SVb di esaki dentro di 2 siman en escrito. Esaki entre otro ta conta pa:

• Den caso di cambio di datonan personal (adres, number di telefon, cuenta di banco).
• Den caso si e pensionado bay biba afo di Aruba of reestablece na Aruba.
• Den caso di fayecimento di casa di pensionado.
• Den caso di casamento.
• Den caso di divorcio of separacion.

Cambio den e situacion personal por tin consecuencia pa e suma di pensioen. E pensionado tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di demanda bek e sumanan cu a wordo paga inhustamente.

Gastonan di entiero

SVb ta cubri gastonan di entiero pa un suma di Afl. 3.171,- (3 biaha e suma di pensioen pa soltero pa luna). Pa esaki SVb mester ricibi un aplicacion dentro di 30 dia despues di e fecha di fayecimento. Den caso cu SVb inhustamente a paga un luna of mas di pensioen despues di e fayecimento, e sumanan aki ta wordo reduci for di e suma total pa e gastonan pa entiero. Tambe den caso cu e fayecido ta sigura pa e gastonan di entiero caba cerca un otro compania, SVb no ta paga full e gastonan di entiero.
Lesa mas: http://new.svbaruba.org/pensioen/fayecimento-di-pensionado/

Terminacion di pensioen

Ora un pensionado fayece, su pensioen ta wordo para inmediatamente si e pensionado tabata ricibi un pensioen di soltero. Ta recomenda tur viuda, viudo of famia di un pensionado cu a fayece pa acudi na oficina di SVb mas pronto posibel despues di fayecimento. Si e fayecido tabata casa bibando hunto, SVb ta paga e pensioen di e defunto pa 3 luna largo despues di e fecha di fayecimento. Den cierto caso e vuida of viudo mester aplica na SVb pa e por ricibi su pensioen di viuda/viudo of soltera/soltero.

Mas informacion

Pa mas informacion por acudi na Departamento di Pensioen di SVb situa na Vondellaan 21, of na SVb San Nicolas situa na Bernardstraat 67C. Orarionan ta mainta di 8:00 am pa 12:00 pm y di 1:00 pm te cu 3:00 pm. Diaranson merdia Departamento di Pensioen ta cera pa publico.
Tambe por tuma contacto na telefon 527 27 60, via email na info@svbaruba.org of medio e formulario aki.

Publica