Fayecimento di Pensionado

Print Friendly

Fayecimento di Pensionado

Ora un pensionado fayece esaki ta trece diferente consecuencia pa e pensioen cu e fayecido tabata ricibi, ademas tambe e tin cierto consecuencianan pa su famia. E consecuencianan ta depende di e estado civil di e pensionado y si e ta sigura pa gastonan di entiero. Ley ta prescribi cu SVb tene cuenta cu dos diferente situacion, sea e pensionado cu a fayece tabata casa bibando hunto, of e tabata soltero of casa pero bibando separa. Akibao ta splica ambos situacion.

Si e fayecido tabata casa y bibando hunto:

Pa e fayecido tabata ricibi pensioen pa pareha casa cu ta bibando hunto (full e suma riba nomber di un persona of cada persona un suma igual na otro) e siguiente ta aplicabel:

  • Pensioen: SVb ta sigui paga e suma di pensioen pa 3 luna largo despues di e fecha di fayecimento.
  • Gastonan di entiero: SVb ta compensa e persona of instancia cual ta para responsabel pa e gastonan di entiero un suma di no mas cu Afl. 3.171,- pa e gastonan di entiero.

Si e fayecido tabata soltero, of casa bibando separa:

Pa e fayecido cual tabata ricibi:

  • pensioen pa viuda of viudo,
  • of pensioen di biehes pa soltero,
  • of pensioen di biehes pa pareha casa cu ta bibando separa,
  • of pensioen di biehes pa pareha cu no ta casa y ta bibando hunto,

e siguiente ta aplicabel:

  • Pensioen: e pensioen ta caduca desde e prome di e sigiuente luna despues di fayecimento. Pues desde e luna despues di a fayece SVb no ta paga pensioen mas na e pensionado of esun cu tin volmacht pa ricibi su pensioen.
  • Gastonan di entiero: SVb ta compensa e persona of instancia cual ta para responsabel pa e gastonan di entiero 3X e suma di su pensioen mensual. Den caso cu e fayecido tabata tin un seguro di entiero cerca un otro compania SVb ta compensa e diferencia entre e suma pa cual e fayecido ta sigura y e suma total di e gastonan di entiero.

Aplica di nobo pa pensioen

Tene cuenta tambe cu pa por sigui haya pensioen despues di fayecimento di su casa, e viuda of viudo mester aplica na SVb pa e por ricibi pensioen di biehes (pa esnan cu edad di 60 aña of mas) of pensioen di viuda of viudo (pa esnan cu edad bao di 60 aña). En coneccion cu aumento di edad di pensioen e edadnan aki ta wordo ahusta entrante 1 januari 2015 (cada aña edad ta subi cu 6 luna).

Pagonan haci inhustamente

Den caso cu SVb inhustamente paga un luna of mas di pensioen despues di e fayecimento, e suma total cu a keda inhustamente paga ta wordo reduci for di e suma total pa e gastonan pa entiero.

Compensacion pa gastonan di entiero

Pa por ricibi e compensacion pa e gastonan di entiero e persona of instancia responsabel pa gastonan di entiero mester aplica na Departamento di Pensioen dentro di 30 dia despues di e fecha di fayecimento. Si e pensionado ta laga atrás un viuda of viudo mester aplica dentro di 28 dia.
Ta suficiente pa notifica SVb medio un email dentro di e periodo di 30 o 28 dia pa cumpli cu e aplicacion pa e compensacion.

Mas informacion

Pa mas informacion por acudi na Departamento di Pensioen di SVb situa na Vondellaan 21, of na SVb San Nicolas situa na Bernardstraat 67C. Orarionan ta mainta di 8:00 am pa 12:00 pm y di 1:00 pm te cu 3:00 pm. Diaranson merdia Departamento di Pensioen ta cera pa publico.
Tambe por tuma contacto na telefon 527 27 60, via email na info@svbaruba.org.

Comments are closed.