Cesantia

Print Friendly

TrahadoKico cesantia ta?

Cesantia ta un pago cu e trahado tin derecho riba dje na momento cu e trahado haya retiro di trabao sin cu e tin culpa na esaki. Pues, cesantia ta un compensacion pa retiro.

Cual trahado ta bin na remarca pa cesantia?

Tur trahado cu ta den servicio di un doño di trabao pa mas cu 1 aña tin derecho riba cesantia. Den caso cu un trahado cu derecho riba cesantia fayece, su famia directo tin derecho riba e cesantia.
Empleadonan publico of otro empleadonan cu nan status legal ta igual na empleadonan publico, no tin derecho riba cesantia.

Ken tin e obligacion pa paga e cesantia?
E doño di trabao tin e obligacion pa paga e cesantia na e trahado cu e ta retira.

Kico ta e fondo di cesantia?
Legislador den pasado a tene cuenta cu por pasa cu e doño di trabao no por cumpli cu su obligacion di paga cesantia. Pa garantisa cu un trahado bao tur circunstancia por ricibi su cesantia, e Ley di Cesantia a institui un fondo di cesantia. Ley a encarga SVb pa administra e fondo.

Ken ta contribui na e fondo di cesantia y cuanto e contribucion ta?
Tur doño di trabao tin e obligacion pa contribui na e fondo di cesantia cada aña. E contribucion anual ta 40 florin pa cada empleado den servicio riba prome di januari.

Ki ora e trahado tin derecho riba cesantia?
Un trahado tin derecho riba cesantia na momento cu e ta cumpli cu e siguiente exigencianan segun ley:

  • E trahado a keda retira di trabao sin cu e tin culpa na esaki.
  • E trahado tin mas cu 1 aña den servicio.
  • E trahado a entrega su peticion pa cesantia dentro di 1 aña desde e fecha di su retiro.
  • E trahado no ta ricibi ningun entrada pa medio di un areglo di pensioen for di e doño di trabao.
  • E trahado ta ricibi un pensioen di trabao directamente despues di a wordo retira y e suma di pensioen di trabao ta menos cu e pensioen di AOV. Tambe e trahado cu ta ricibi pensioen, cual ta menos cu 2 biaha e pensioen di AOV, despues di a deduci parcialmente of full e suma di pensioen di AOV for di e plan di areglo di pensioen, tin derecho riba cesantia.

Ki ora e trahado tin derecho riba cesantia for di e fondo di cesantia?
Un trahado ta haya derecho riba pago di cesantia for di e fondo di cesantia na momento cu e doño di trabao no por cumpli cu su deber di cesantia pa motibo di bancarota, suspension di pago of no por cumpli mas cu su obligacion financiero. Den e ultimo caso, SVb ta haci investigacion pa determina esaki.

Con e trahado por haci su peticion pa cesantia?
Un trahado mester pasa personalmente na oficina di SVb na Vondellaan 19E pa yena su peticion. Pa por procesa e peticion e trahado mester presenta cu:

  • Su paspoort, cedula of rijbewijs valido.
  • Su werkboek of e contract di trabao.
  • Su carta di retiro si e ta disponibel.
  • Su payslipnan di e ultimo 2 lunanan.

Cuanto ta e suma di cesantia riba cual e trahado tin derecho?
E suma di cesantia ta depende di e cantidad di añanan di servicio di e trahado. Ley di cesantia ta prescribi cu:

  • Pa e añanan di servicio entre 1 pa 10 aña, e trahado ta ricibi un pago igual na su salario di 1 siman pa cada aña di servicio.
  • Pa e añanan di servicio entre 11 pa 20 aña, e trahado ta ricibi un pago igual na 1 y un cuart (1¼) di su salario di 1 siman pa cada aña di servicio.
  • Pa e añanan di servicio mas cu 20 aña, e trahado ta ricibi un pago igual na 2 bes su salario di 1 siman pa cada aña di servicio.

Despues di e prome aña di servicio, tur periodo mas cu 6 luna ta conta como un aña completo.

Un ehempel con ta calcula e suma di cesantia
Un ehempel: un trahado a haya su retiro despues di a traha pa un compania pa 23 aña. Su salario pa siman ta Afl. 700,-. Su cesantia ta wordo calcula como lo siguiente:

  1. Pa e añanan di servicio entre 1 pa 10 aña, e ta ricibi un pago igual na su salario di 1 siman (Afl. 700,-) pa cada aña di servicio. Pues pa e prome 10 añanan di servicio e trahado ta ricibi e suma di (10 x 700) Afl. 7.000,-.
  2. Pa e añanan di servicio entre 11 pa 20 aña, e ta ricibi un pago igual na 1¼ di su salario pa siman (1¼ x 700 = 875) pa cada aña di servicio. Pues pa e añanan di servicio entre 11 pa 20 aña, e ta ricibi e suma di (10 x 875) Afl. 8.750,-.
  3. Pa e añanan di servicio mas cu 20 aña, e ta ricibi un suma igual na 2 bes su salario pa siman (2 x 700 = 1400) pa cada aña di servicio. Pues pa e 3 añanan di servicio riba 20 aña, e trahado ta ricibi e suma di (3 x 1400) Afl. 4.200,-.

E suma total di cesantia den e ehempel aki ta (7000+8750+4200)
Afl. 19.950,- (prome cu retencion di loonbelasting y pago di primanan di AOV/AWW y AZV).

Salario maximo usa pa e fondo di cesantia
Pa calculacion di e suma di cesantia, paga for di e fondo di cesantia, ley ta stipula un salario maximo pa siman. Pa aña 2010 e salario maximo pa siman ta Afl. 1.575,-. Cada aña e suma ta keda evalua y por cambia pa ley. Den caso cu e salario pa siman di e trahado ta mas halto cu e salario maximo, SVb ta usa e suma di e salario maximo pa determina e suma di cesantia.

Retencion di belasting y prima
Pa ley SVb ta obliga pa retene loonbelasting (15%) y e primanan di AOV/AWW (13,5%) y AZV (11,5%) for di e suma di e cesantia.

Mas informacion

Pa mas informacion por tuma contacto cu SVb na telefon 527-2755 of 527-2812, via email na info@svbaruba.org of medio e formulario aki.

Share

Comments are closed.