Sosten Financiero

Recien Gobierno di Aruba a anuncia e ayudo pa empresanan chikito y mediano. E ayudo aki ta bin den forma di un sosten financiero cu ta Afl. 4000,- pa kwartaal si ta cumpli cu tur e rekisitonan.

Pa ricibi e sosten financiero pa compania chikito y mediano mester cumpli cu e siguiente rekisitonan:

• Ta registra na SVb cu un maximo di 50 empleado
• Tur empleado mester ta registra cerca SVb riba 15 maart 2020
• Ta registra cerca Camara di Comercio riba 15 maart 2020 (cu excepcion pa esnan cu no tin obligacion legal di ta registra)
• Ta registra na DIMP riba 15 maart 2020 y tin number personal
• Ta spera perdida di por lo menos 25%
• Ta estableci fisicamente na Aruba
• E empresa no ta failliet
• No tin peticion pa suspencion di pago na Corte di Husticia
• E ayudo di Afl 4000,- no ta parti di e benta di e empresario

No tin peticion pa entrega pa e sosten financiero, si ta cumpli cu tur e rekisitonan e sosten financiero ta wordo paga automaticamente.

E prome pago di e Sosten Financiero a tuma luga riba 29 april 2020 mediante SVb.

Den caso cu un compania registra na SVb no a ricibi e pago di e Sosten Financiero, por tuma contacto cu SVb na info@svbaruba.org of na 527-2700 pa mas informacion.

Mester menciona werkgeverscode y nomber di e compania. SVb lo manda e informacion pa e e-mail registra den administracion di SVb. No ta posibel pa ricibi e informacion na telefon, tampoco riba un otro e-mail cu no ta conoci na SVb.

Den caso cu no ta bin na remarca pa ricibi e Sosten Financiero por manda un obhecion na bezwaarnoodplanregeling@svbaruba.org.

Landscourant Aruba a publica e regeling aki den su publicacion no. 9 di 24-04-2020. Por wak esaki akinan: Landscourant van Aruba 9 2020 (pagina 7-8).