Relato di Prensa Flex Pensioen

SVb ta anuncia:

“Flex Pensioen” ta recompensa esunnan cu yega edad di pensioen cu un suma mas halto pa luna

Haya sa mas riba bo derecho pa pospone bo pensioen!

 

ORANJESTAD , Aruba 29 Augustus 2012: Sociale Verzekeringsbank (SVb) a anuncia nan campaña informativo pa educa nos comunidad tocante e sistema nobo di “Flex Pensioen”. Recien Gobierno di Aruba a cera un acuerdo cu partnernan social mediante cual a introduci e posibilidad pa pospone e cobransa di pensioen di AOV (pension di biehes). Como un forma di recompensa, e ciudadano cu a yega edad di pensioen (60 aña) por  haya un suma mas halto na pensioen di AOV si e opta pa haci uzo di e areglo di Flex Pensioen.

 

Esaki ta un areglo cu a drenta na vigor desde dia 1 di Januari 2012, locual ta nifica cu tur persona cu ta bin na remarke pa cobra pensioen di AOV pa prome biaha por haci uzo di e areglo aki.

 

Luis Tromp, hefe di Departamento di Pensioen na SVb a splica cu “Flex Pensioen” ta un beneficio pa tur esunnan cu yega edad di pensioen. Tur hende cu yega 60 aña tin derecho riba nan pensioen general di biehes, y pues por haci uzo di e areglo di Flex Pensioen.

 

Sr. Tromp a sigui splica cu “Flex Pensioen” ta un sistema cu ta pospone e cobransa di pensioen, pues en bes di cobr’e ora ta cumpli 60 aña, e pensionado tin e opcion pa pospone cu un maximo di 5 aña. Por ta 1 aña, 2 aña, 3 aña, 4 aña of 5 aña. Cada aña cu e pensionado pospone su pensioen e lo ricibi como recompensa 7% riba e montante corespondiente di pensioen.

 

Por ehempel, e persona cu scoge pa cobra su pensioen cu 60 aña ta ricibi e suma maximo di AWG. 1.057- pa luna. Cu “Flex Pensioen”, e por scoge pa cuminsa cobra su pensioen na edad di 61 aña en bes di 60 aña. Si e pensionado dicidi di cobra su pensioen cu 61 aña, na luga di ricibi AWG. 1.057- pa luna, su suma mensual ta subi cu 7% y ta bira AWG. 1.130,99- pa luna. Di e manera aki por keda pospone cobransa di pensioen te cu un maximo di 5 aña.

 

Ta hopi importante pa esnan cu ta riba 50 aña di edad, sea hende homber of hende muhe, pa nan ta consciente di tur e beneficionan di e sistema aki di “Flex Pensioen”. Tambe ta hopi bon pa esna mas jong cuminsa haya informacion riba e forma con “Flex Pensioen” lo por beneficia nan den futuro.

 

E ciudadano cu aplica pa e Pensioen di Biehes AOV dibiaha ta bin na remarke pa haci uzo di e areglo di Flex Pensioen. Ora di acudi na SVb pa e pensioen di biehes e cuidadano por yena e formulario pa haci uzo di e areglo di Flex Pensioen.

 

Gino Croes, funcionario di comunicacion a splica cu awe ta lanza e campaña di Flexpensioen na unda SVb ta bay informa y concientisa su aseguradonan di e areglo di Flex Pensioen y tur su beneficionan. E campaña aki ta bay haci uzo di diferente medionan di comunicacion manera corant, radio emisoranan y canalnan di television local.

 

Ademas, cu cooperacion di partnernan ta bay tin foyetonan disponibel na puntonan strategico rond di Aruba. Tambe ta ofrece tur e informacion aki riba e website di SVb www.svbaruba.org. Locual tambe sr. Croes a menciona ta cu ta organisa algun anochi di informacion na unda tur esnan interesa por acudi y haci nan preguntanan na SVb. E detayes pa anochinan aki lo wordo anuncia ainda.

Pa mas informacion y pa aplica por tuma contacto cu Departamento di Pensioen na 527-2760 of via pensioenen@svbaruba.org. Departamento di Pensioen ta situa na Vondellaan 21 y ta habri di dialuna pa diabierna di 8:00AM te cu 12:00PM y for di 1:00PM te cu 3:00PM. Nan ta cera pa publico tur diaranson merdia.

 

A funda Sociale Verzekeringsbank (SVb) na aña 1960 pa administra e ley di pensioen di biehes (AOV). Na aña 1965 a expande e tareanan di SVb cu introduccion di e ley di pensioen general pa viuda y huerfano (AWW). Na aña 1966 un otro tarea adicional a bin pa SVb ora a introduci e ley di seguro di malesa (ZV) y accidente di trabao (OV). Finalmente na aña 1983 a keda institui un fondo di cesantia pa garantisa e compensacion di trahado den caso di retiro no boluntario.

 

Desde Status Aparte di nos pais, SVb a para riba su mes y a desaroya den un institucion clave den nos red di proteccion social. Cu inversionnan den recurso humano y su experiencia acumula durante e periodo di crisis y boom economico y tambe di cantidad di poblacion, SVB awe ta un institucion cu ta lora independiente, cu un maneho corporativo eficiente, un servicio atento y cu un gran sentido di responsabilidad.

 

FIN

This entry was posted in AOV, Pensioen and tagged , . Bookmark the permalink.