Extra Reparatietoeslag pa pensionadonan biba na Aruba

Recientemente Gobierno di Aruba a anuncia cu entrante 1 di januari 2013 a keda introduci e derecho riba un extra reparatietoeslag di 50 florin pa luna pa personanan cu ta cobra pensioen di AOV, pensioen di biehes.
Pa un pensionado di AOV bin na remarca pa e extra reparatietoeslag aki e mester cumpli cu e siguiente 3 exigencianan:
1. Banda di e pensioen di AOV, e pensionado no tin ningun otro entrada;
2. E pensionado mester ta inscribi na registro civil di Aruba;
3. Mester entrega e declaracion cu a ricibi hunto cu e carta di e extra reparatietoeslag.

Tur pensionado kendenan ta cumpli cu e exigencianan bao punto 1 y 2, por yena e formulario y entrega esaki. Pa brinda un miho servicio SVb ta organisa dianan pa entrega e formulario aki den tur e barionan rond di Aruba den e lunanan di februari y maart. E fechanan y sitionan di entrega e declaracion lo wordo anuncia den prensa dentro di algun dia.

Ora di entrega e formulario tur pensionado ta ricibi un comprobante di entrega.
E personanan cu entrega nan formulario prome cu dia 15 di maart 2013 na SVb, lo cobra e toeslag di lunanan di januari, februari, maart y april 2013 hunto cu e pensioen di april. Esnan cu entrega esaki entre 15 y 31 di maart 2013 lo cobra e reparatietoeslag di luna di januari te mei hunto cu e pensioen di mei. Despues di e pagonan aki e reparatietoeslag lo keda paga cada luna hunto cu e pensioen.
Esnan cu entrega e formulario despues di 31 maart 2013 no ta ricibi e extra reparatietoeslag retroactivo mas pero desde e luna di a entrega e formulario.

Personanan riba 60 aña, di cual e pensioen di AOV ta riba nomber di e casa, y ta cumpli cu e exigencianan 1 y 2, tambe lo mester yena e formulario pa haya e extra reparatietoeslag.
Manera menciona SVb lo tin dianan pa asisti pensionadonan den e diferente barionan pa yena y entrega e formulario aki. Keda pendiente di e anuncionan en conexion cu esaki den prensa.
Pa mas informacion por tuma contacto cu Departamento di Pensioen na telefoon 527-2760 of email na info@svbaruba.org.

Reparatietoeslag_Papiamento

Reparatietoeslag_Nederlands

Posted by