fbpx

Tips pa Doño di Trabao: Con pa tuma Notificacion di AO durante Shelter in Place

Ta bon pa ta prepara ora un trahado notifica AO. No solamente pa administra un registro di AO, pero tambe pa tene cuenta cu e parti humano. Di parti di SVb algun tips pa tur cu ta tuma notificacion di AO.

  1. No duna un huicio riba e notificacion, no bisa nada cu ta mustra cu bo ta pro of contra e notificacion.
  2. Puntra e trahado cuanto dia e ta kere cu e tin mester prome cu e por presenta bek na trabao.
  3. Mustra empatia pa cu e trahador. Puntra e trahador si loke e ta sinti por tin di haci cu presion di trabao of situacion na cas.
  4. Mustra disponibilidad pa atende cualkier issue na trabao cu porta ta molestia e trahado.
  5. Corda e trahado cu den caso cu e ta sigui malo riba e fecha cual a palabra pa presenta bek na trabao, pa e yama atrobe.
  6. Ora un trahado yama anota su informacion completo:
    – Nomber y fam completo
    – Number di identificacion of fecha di nacemento
    – fecha riba cual ta notifica AO
    – fecha riba cual ta bin traha bek (si e trahado a sigui malo ta cambia e fecha aki)

No lubida: bisa e trahado cu e ta importante no solamente pa e compania pero pa henter nos comunidad den e dianan aki. Como servicio esencial, e ta importante mas cu nunca!

Nos ta den un situacion extra ordinario. Mustra bo miho cara como doño di trabao pa fortifica bo relacion cu bo trahadonan ariba termino largo. Hunto nos ta sigui duna proteccion social na nos trahadonan.

Lesa e ultimo noticia oficial riba website di DVG: https://www.arubacovid19.org/

Nos ta recorda tur doño di trabao cu nos portal MiSVb 2.0 y su Helpdesk ta keda habri durante e Shelter in Place.

Pa mas informacion por tuma contacto cu SVb na info@svbaruba.org.

Posted by