fbpx

Subsidio di Salario – October 2020

For di 20 october te cu 26 di october por aplica pa subsidio di salario pa luna di october, 2020

SVb ta anuncia cu e periodo pa aplicacion pa subsidio di salario pa luna di october ta cuminsa diamars, dia 20 di october, 2020 pa 8‘or di mainta. Tur dunado di trabou cu ta bin na remarca pa aplica pa subsidio di salario ta ricibi un notificacion di SVb.

Ultimo dia pa aplica pa subsidio di salario pa luna di october ta 26 di october, 2020, fin di dia (11:59 PM).

Tur rekisito pa subsidio di salario a keda mescos pa luna di october:

  1. E compania a wordo afecta den un forma negativo pa motibo di COVID-19;
  2. E compania tin un perdida di entrada premira di por lo menos 25% den e luna di e subsidio;
  3. E compania no ta permiti pa retira empleado pa motibonan socio-economico;
  4. E compania ta paga e empleado minimal 60% di su salario;
  5. E compania y tur empleado ta registra na SVb riba 15 di maart 2020;
  6. E compania ta registra na Departamento di Impuesto y tin un persoonsnummer;
  7. E compania ta cumpli cu pago di impuesto y primanan social di e luna corespondiente cu a aplica pa subsidio;
  8. E compania mester aplica pa e subsidio;
  9. E compania a cumbini cu tur trahado un reduccion di arbeidsomvang cu por varia entre 0% te cu maximal 40%.

SVb ta recorda tur dunado di trabou cu pa aplica pa subsidio di salario pa luna di october e dunado di trabou mester a cumpli cu e pago di tur prima y seguro social pa luna di mei, juni, juli, augustus y september. SVb ta referi aki na e primanan di AZV, AOV/AWW, pensioen general di trahado y ZV/OV. Ta e deber di e dunado di trabou pa paga e primanan aki.

SVb un biaha mas ta pidi tur dunado di trabou pa tuma nan tempo y lesa e notificacion, y especialmente e checklist, bon prome cu bay aplica pa evita cu ta entrega cos robes of incompleto. Despues di a entrega e aplicacion e dunado di trabou no por haci cambio mas.

Pago di subsidio di salario pa luna di october di parti di SVb pa e dunado di trabou ta wordo ehecuta diariamente segun cu e aplicacion di e compania keda aproba. Dunado di trabou ta responsabel pa verifica cu su cuenta di banco ta corectamente registra na SVb.

Pa facilita e proceso di aplicacion y contesta pregunta di dunado di trabou y trahado relaciona cu e programa di Subsidio di Salario por tuma contacto cu e Service Center via mail na loonsubsidie@svbaruba.org. Por lesa mas informacion di e Subsidio di Salario riba e pagina aki: Subsidio di Salario.

Posted by