fbpx

Boet Adminstrativo SVb

Diabierna mainta Director di SVb Sr. ir. Edwin Jacobs a manda mediante di E-Mail e prome notificacionnan relaciona cu e Boet Adminstrativo cu e keda introduci pa Doñonan di Trabao. Tabata na april di 2016 cu Parlamento di Aruba a pasa e ley den cual ta duna SVb autorisacion pa sanciona Doño di Trabao cu no ta cumpli cu inscripcion di nan trahadonan.

Na juli di 2017 e ley aki ta drenta na vigor y di parti di SVb a duna un temporada di gracia pa tur doño di trabao por a pone nan administracion na ordo.

Seguro di Malesa, Seguro di Accidente (bou ora di trabao) y Cesantia ta leynan cu e contribucion na esakinan mester wordo paga pa e Doño di Trabao. Ta e responsabilidad di cada Doño di Trabao di duna e trahado oportunidad pa inscribi na SVb prome cu e cuminsa traha of tambe e trahado por  inscribi riba e prome dia di trabao. Cada dia cu e trahado traha sin ta inscribi e Doño di Trabao ta falta di cumpli cu e leynan di SVb y esnan cu no cumpli cu esaki ta bin na remarca pa ricibi un Boet Adminstrativo.

E Boet Adminstrativo tin  3 categoria: 1. No a duna informacion completo of corecto; 2. No a inscribi trahado na tempo; 3. No a inscribi trahado. Na momento cu SVb finalisa control y a keda comproba cu e Doño di Trabao no a cumpli cu ley, esaki lo haya un notificacion digital (via di E-mail) cu SVb tin intencion pa duna un Boet Administrativo. Den e notificacion SVb ta splica e motibonan pakico ta bay ricibi e boet, ademas ta informa riba e suma di boet. Ta importante pa menciona cu e boet ta pa cada trahado cu no a wordo inscribi of no inscribi debidamente. Si un empresa a falta e leynan di SVb cu por ehempel 6 trahado, SVb ta evalua cada trahado su situacion y lo impone un boet pa riba e Doño di Trabo pa cada trahado.

E Doño di Trabao tin 3 siman despues di fecha di e notificacion aki pa entrega un obhecion. E obhecion por wordo entrega riba nos website www.svbaruba.org/obhecion of mediante un carta dirigi na director di SVb : ir E.M.  Jacobs, Caya Punta brabo 19, Oranjestad. Si dentro di 3 siman SVb no ricibi un obhecion automaticamente e Doño di Trabao ta acepta cu el a falta di cumpli cu leynan di SVb.

SVb ta duna tur Doño di Trabao cu a ricibi un Boet Adminstrativo 6 siman pa cumpli cu e pago. Si tin dificultad pa cumpli cu e suma poni como boet por tuma contacto cu SVb pa yega na un areglo di pago. Mester menciona cu si no cumpli dentro di 6 siman  y no tuma contacto cu SVb lo por sigui un aanmaning, dwangschrift y beslag.

Por lesa mas tocante e maneho di SVb tocante e Boet Administrativo riba nos website www.svbaruba.org/boet.

Posted by