fbpx

SVb Ta Sigui Mehora Servicio Pa AOV

coupleApril ta introduci division di Pensioen di parehanan casa.
Banco di Seguro Social, SVb ta bay dividi gradualmente e suma di pensioen di tur pareha pensionado casa cu anteriormente no a aplica pa esaki. E division di e pensioen no lo tin influencia riba e suma total di pensioen cu e pareha tabata ricibi. E parti di cada pensionado den e pensioen di pareha ta keda calcula individualmente, dependiendo di e añanan cu e persona a biba na Aruba entre su edad di 15 aña te cu e edad di pensioen.

Banco di Seguro Social, SVb, den cumplimento cu articulo 4 di e richtlijn 79/7/EEG di Comunidad Europeo, conforme decision di di Colegio di Apelacion di AOV/AWW, a inicia e proceso di dividi pensioennan di parehanan casa, di cual ambos tin derecho riba pensioen di AOV.
E articulo 4 di e richtlijn menciona di Comunidad Europeo ta indica cu gradualmente lo mester introduci, conforme principio di derecho internacional, trato igual entre hende homber y hende muher riba tereno di seguridad social.
Colegio di Apelacion di AOV/AWW a determina cu e articulo 4 aki tin forsa di ley na Aruba y mester keda aplica.
E articulo 4 aki ta encera cu cada persona casa, individualmente tin derecho riba pension di AOV. Den cumplimento di e principio di derecho internacional aki, SVb, a inicia e proceso di otorga cada persona casa cu tin e edad di pensioen y cu ta cobrando un pensioen di AOV hunto cu su pareha, directamente e parti di e pensioen di pareha cu ta corresponde na e persona.

Pa e pensionado esaki ta encera cu e pensioen di pareha casa cu ta wordo paga hunto y na un solo persona lo wordo dividi entre e persona ey y su casa, cu tambe a yega e edad di pensioen. Actualmente e suma di AOV esta e pensioen di biehes pa pareha ta Afls 1.780,=, den caso cu tur dos persona a biba entre nan 15 aña di edad y edad di pensioen na Aruba. Cu e aplicacion di e division di pensioen, cada un lo ricibi un suma di pensioen calcula separadamente den proporcion na e cantidad di añanan acumula di pensioen cu cada pensionado tin derecho riba dje.

E suma di pensioen di cada pensionado lo keda deposita riba e mesun cuenta di banco cu ta wordo uza actualmente. Ora di controla e cuenta di banco lo por observa dos suma cu a keda deposita.

Si e persona cu awor ta bay ricibi su pensioen separa for di su casa ta desea pa e suma di pensioen wordo deposita riba un cuenta di banco separa, por acudi libremente na Departamento di Pensioen pa haci e cambio aki.
Departamento di Pensioen di SVb ta situa na Oranjestad den Vondellaan 21 y na San Nicolas den Bernhardstraat 67C edificio di SVb San Nicolas.
Ta hopi importante pa tuma nota cu SVb su oficinanan di pensioen ta sera pa publico na Oranjestad riba diaranson merdia y na San Nicolas diaranson henter dia.
SVb ta spera di e informa comunidad suficientemente riba e materia aki.

Posted by