|
COMUNICADO DI PRENSA
Banco di Seguro Social di Aruba, SVb, mediante e comunicado aki
ta desea di suministra comunidad cu mas informacion respecto algun
cambio di ley, cu ta regarda ley di Seguro di Malesa.
Proyecto di ley
Dia 1 di oktober ultimo e proyecto di ley promulga na september di
e aña aki a drenta na vigor. E proyecto di ley ta encera
cambio den tres ley existente, di cual dos ta leynan di seguro
social, esta ley di Seguro di Malesa y ley di Seguro di Accidente.
Den e comunicado aki, SVb ta informa nos aseguradonan mas di e
cambionan den e ley di Seguro di Malesa. Nos aseguradonan ta
trahadornan cu ley ta otorga e derecho di participa na e Seguro di
Malesa y pa cual doñonan di trabao ta paga un prima tur luna.
Pues den e articulo aki, unda ta menciona trahador, mester lesa
trahadornan di sector priva cu ta cubri pa e ley di Seguro di
Malesa.
Prome cambio
Prome cu 1 di juli 2005, tabata existi tres diferente compensacion
di salario pa e trahador den caso di malesa. E compensacion tabata
depende si e trahador ta casa, si e ta cabes di cas y si ta
hospitalisa. Trahadornan masculino casa y trahadornan soltero
masculino pero cu ta cabes di cas, tabata ricibi un compensacion di
80% di su salario diario. Trahadornan soltero y hende muhernan casa
y cu no ta cabes di cas, tabata ricibi un compensacion di 70% di e
salario diario y den caso di ta hospitalisa tabata ricibi 50% como
compensacion.
Entrante 1 di juli 2005, anticipando e cambio di ley cu a drenta
awor na vigor, conforme peticion di gobierno, SVb a cuminsa otorga
e compensacion di 80% di e salario sin ningun distincion.
Di dos cambio
E di dos cambio importante den e ley di Seguro di Malesa
ta regarda e periodo di verlof y compensacion durante embarazo y
parto. Entrante 1 di juli 2005, anticipando e cambionan di ley, SVb
a cuminsa compensa e trahador femenino durante su periodo di
embarazo y parto 100% di salario durante e periodo di verlof,
contrario na e compensacion cu tabata depende di estado civil di e
trahador hende muher. Ademas a cuminsa na compensa 12 siman di
verlof en vez di 8 siman. Y entrante 1 di oktober 2007 e cambionan
aki a keda formalisa. Di e forma aki, Aruba ta cumpliendo cu
recomendacion di Organisacion Internacional di Labor, ILO.
Di tres cambio
E di tres cambio relevante den e ley di Seguro di Malesa ta e
forma cu ta compensa trahadornan, mediante dunador di trabao, cu pa
motibo di malesa no por traha.
Prome cu 1 di oktober 2007, e ley di Seguro di Malesa ta prescribi
cu pa trahadornan cu pa motibo di malesa no por traha ta ricibi
mediante nan dunador di trabao un compensacion pa e dianan cu nan
tabata a.o. E doño di trabao tabata ricibi e compensacion aki
solamente na momento cu e trahador keda mas cu 3 dia a.o. Den caso
cu e periodo di a.o. ta 3 dia of menos, e dunador di trabao no
tabata ricibi compensacion di e dianan aki pa e trahador for di
SVb.
Entrante 1 di oktober 2007 e ley ariba e punto aki a cambia. Awor
e dunador di trabao no ta ricibi compensacion pa e trahador cu ta
a.o. durante e prome 3 dianan.
Ta importante pa trahadornan y dunadornan di trabao tuma bon nota
di e cambio den e ley di Seguro di Malesa.
Rol SVb
E ley di seguro di malesa ta encarga SVb cu e ehecucion di e ley
di seguro di malesa. SVb ta realisa esaki segun e ley y den caso cu
e ta considera necesario pa cambia of modifica e ley ta duna
conseho alrespecto na e Ministro encarga cu e leynan di seguro
social.
Di e forma aki SVb ta spera di a trece aclaracion riba e ultimo
cambionan den e ley di Seguro di Malesa.
|
