Pensioen di Viuda

Kico ta e pensioen di viudo y viuda (AWW)?

E Ley di Seguro di Viudo y Huerfano (Algemene Wezen- en Weduwen-verzekering of AWW) ta un seguro pa tur persona cual ta cubri e consecuencianan financiero di fayecimento di un casa cual ta un asegurado. Esaki ta nifica cu na momento cu un persona bira un viuda of viudo e ta eligibel pa ricibi un pensioen na acuerdo cu e ley di AWW.

Cuanto e pensioen di viuda of viudo ta?

E suma di pensioen pa viuda of viudo ta:

• Te cu 39 aña Afl. 476,- pa luna.
• Di 40 te cu 48 aña Afl. 639,- pa luna.
• Di 49 te cu 57 aña Afl. 808,- pa luna.
• Di 58 te cu 59 aña Afl. 1.057,- pa luna.

Si un viudo of viuda tin yiu(nan) cu ta bayendo school, e viudo of viuda ta ricibi e suma di Afl. 1.057,- pa luna te ora e yiunan yega e edad di 25 aña, te ora e viuda of viudo casa bek di nobo, of te ora nan stop di atende school.
E sumanan aki ta conta pa aña 2011 y por wordo cambia pa ley.

Pa ken e pensioen di viuda of viudo ta?

E pensioen di viuda of viudo ta pa tur persona cual su esposa of esposo a fayece. E seguro ta cubri tur pareha casa te na e edad di 60 aña.
Na momento cu un viudo of viuda yega e edad di 60 aña e pensioen di viudo ta caduca, y e viuda of viudo ta bin na remarca pa ricibi un pensioen di biehes. E persona cu ta ricibi un pensioen di viudo no ta ricibi e pensioen di biehes automaticamente ora e yega e edad di 60 aña. E mester aplica na SVb di nobo pa ricibi e pensioen di biehes.
Tambe den caso cu un viudo of viuda casa di nobo e pensioen di viudo ta caduca.

Con un viuda of viudo por aplica pa ricibi pensioen di viudo?

E persona cu ta aplica pa pensioen di viudo mester presenta na SVb cu e siguiente documentonan:

• Un paspoort, rijbewijs of cedula valido. Preferiblemente presenta cu e cedula pa SVb por tuma nota di e number di identificacion. Esaki ta acelera e proceso di control na censo.
• E acto di fayecimento di e casa.
• Un pasfoto recien.
• Un documento oficial cu e number di cuenta na banco.
• E buki di casamento. Si e pareha a casa afo, e aplicado mester bin cu e certificado di casamento cu tin e stempel di censo.

Den caso cu e defunto a fayece afo di Aruba, e solicitante mester presenta cu e paspoort di e defunto. Tambe si e defunto a bay afo pa ricibi tratamento medico, SVb mester di e carta di AZV.

Rekisito adicional pa esnan cu ta biba afo

Si e persona cu ta aplica pa e pensioen di viudo no ta biba na Aruba of Hulanda, e ta obliga pa duna SVb un attestatie de vita (prueba na escrito cu e persona indica ta na bida) na momento di aplicacion.
Despues cu e aplicacion a keda aproba e persona cu ta biba afo mester percura pa SVb ricibi un attestatie de vita cada 3 pa 6 luna. SVb no ta acepta copia di e attestatie di vita. Esnan cu ta biba afo por entrega e attestatie de vita na:

• Den cierto caso na SVb di ex-Antias Hulandes.
• Den cierto caso na un embahada Hulandes.

E attestatie de vita ta obtenibel na oficina di gobierno of cerca un abogado of notario. Si e viuda of viudo ta na Aruba temporalmente e por pasa na SVb cu su paspoort, rijbewijs of cedula valido.

Cambio personal

Den caso di cambio den e situacion personal di e viuda of viudo e ta obliga pa notifica SVb di esaki dentro di 2 siman en escrito. Esaki entre otro ta den caso di:

• Cambio di dato personal (adres, number di telefon, cuenta di banco).
• Den caso cu e viuda of viudo bay biba afo di Aruba of reestablece na Aruba.
• Den caso cu un viudo of viuda casa.
• Den caso e yiu(nan) di un viudo of viuda no ta atende school mas.

Den caso cu tin cambio den e situacion personal, esaki por tin consecuencia pa e suma di pensioen. E viuda of viudo tin e obligacion pa tene SVb na altura di cualkier cambio di su situacion personal. Den caso cu SVb paga pensioen inhustamente, SVb tin derecho di demanda bek e sumanan aki.

Terminacion di pensioen

E pensioen di viuda of viudo ta wordo termina bao e siguiente circumstancianan:

• Na momento cu e viuda of viudo casa di nobo.
• Na momento cu e viuda of viudo yega e edad di 60 aña. E viuda of viudo mester aplica cerca SVb pa ricibi un pensioen di biehes na e edad di 60 aña.

Mas informacion

Pa mas informacion por acudi na Departamento di Pensioen di SVb situa na Vondellaan 21, of na SVb San Nicolas situa na Bernardstraat 67C. Orarionan ta mainta di 8:00 am pa 12:00 pm y di 1:00 pm te cu 3:00 pm. Diaranson merdia Departamento di Pensioen ta cera pa publico.
Tambe por tuma contacto na telefon 527 27 60, via email na info@svbaruba.org of medio e formulario aki.

Publica