Banco di Seguro Social Aruba – Social Security Bank of Aruba – Sociale Verzekeringsbank Aruba

Flexpensioen-AOV kico e ta?

E Flexpensioen-AOV ta encera cu e persona cu yega 60 aña y ta haya e derecho riba un  pensioen di biehes di SVb, ta haya e derecho tambe pa pospone cobransa di su pensioen  cada vez cu 1 aña. Esaki ta nifica cu por ehempel un persona por scoge pa no cobra su   pensioen di biehes ora e yega 60 aña pero ta lag’e aden pa un aña y por cuminsa cobra  esaki cu su 61 aña. E siguiente aña e persona por bolbe dicidi di pospone e pensioen cu un otro aña, pa asina e cobra esaki cu 62 aña. Esaki e por haci pa un maximo di 5 biaha. E  areglo di flexpensioen-AOV ta drenta na vigor entrante 1 di januari 2012.

Kico ta e beneficio cu mi ta ricibi a cambio di pospone mi pensioen?

Pa cada aña cu un persona pospone su pensioen di biehes, e suma di su pensioen acumula te na e momento ey ta aumenta cu 7%.

Laga nos ilustra esaki cu un ehempel di e pensioen pa un persona soltero. Na momento di yega 60 aña e pensioen di e persona aki ta AWG 1.057,- florin
 pa luna. E ta dicidi di pospone su pensioen. Cu su 61 aña, su pensioen di biehes ta aumenta cu 7% di AWG 1.057,- y ta bira AWG 1.131,- florin pa luna.
Si e persona dicidi di pospone un biaha mas na su 61 aña, su pensioen lo sigui aumenta cu 7% di AWG 1.131,- y bira AWG 1.211,- florin pa luna. E tabel akibao ta duna un bista di con e pensioen di soltero y pensioen di casa ta aumenta ora cu e keda pospone.

Si mi casa a cuminsa cobra pensioen di biehes caba, ora mi yega 60 aña mi por pospone mi parti pa mi haya mas pension?

Si, den caso cu bo casa a cuminsa cobra pensioen di biehes
caba, na momento cu bo persona cumpli 60 aña bo ta haya e derecho pa pospone bo parti di pensioen cu bo persona tin derecho ariba dje. Laga nos ilustra esaki cu un ehempel. Bo casa ta mas cu 60 aña y e ta ricibiendo AWG 1.780,- florin pa luna na pensioen. Na momento cu bo persona cumpli 60 aña, bo persona ta haya derecho riba AWG 890,- florin di e AWG 1.780,-. Si bo dicidi di pospone bo pensioen, bo pensioen ta aumenta cu 7%. Cu bo 61 aña bo por cobra un pensioen di AWG 953,- florin pa luna.

Un pareha ta permiti pa pospone un maximo di 5 biaha. Pa esaki ta conta e biahanan cu cada un a pospone. Por ehempel si e partner cu a yega 60 aña prome pospone 2 biaha, e otro partner na momento cu e yega 60 aña por pospone su parti di pensioen cu solamente 3 biaha. Asina hunto e pareha ta pospone 5 biaha.

Kico mi mester haci pa mi por pospone mi pensioen?

Un luna prome cu bo derecho riba pensioen cuminsa bo mester acudi na departamento di Pensioen di SVb pa
entrega e peticion pa pospone bo pensioen. Mester corda cu bo derecho riba pensioen ta cuminsa e luna siguiente na esun cu bo a cumpli 60 aña. Si bo ta cumpli aña na januari, bo derecho riba pensioen ta cuminsa na luna di februari

Tur hende por dicidi di pospone su pensioen?

Si, tur persona cu ta cumpli cu e exigencianan pa haya pensioen di biehes por dicidi di pospone su pensioen.

Si mi dicidi di pospone mi pensioen, na caminda mi por revoca e posponemento?

No, durante e aña cu bo persona pospone e pensioen bo no por revoca esaki.

Si mi entrega mi peticion pa pensioen despues cu mi cumpli 60 aña, mi por pospone mi pensioen ainda?

No, pa por pospone bo pensioen di biehes e peticion pa pospone mester keda entrega un luna prome e derecho riba pensioen di biehes drenta na vigor.  

Mas informacion

Pa mas informacion por tuma contacto cu Departamento di Pensioen na 527-2760 of via info@svbaruba.org.
Departamento di Pensioen ta habri di dialuna pa diabierna di 8:00 AM te cu 12:00 PM y desde 1:00 PM te cu 3:00 PM.
Departamento di Pensioen ta cera pa publico tur diaranson merdia.

Publica

Banco di Seguro Social Aruba SVb ta anuncia cu en conexion cu celebracion di Pasco di Nacemento, tur su oficinanan lo ta cera pa publico riba e siguiente dianan:

• Diabierna 23 december 2011
• Diasabra 24 december 2011
• Diadomingo 25 december 2011
• Dialuna 26 december 2011

Diamars 27 di december tur oficina di SVb ta habri na e orario normal atrobe. E ceramento no lo afecta e sistema di Webportaal di SVb.

Orario pa notifica AO (meld ziek) tambe ta limita riba e siguiente dianan:

• Diabierna 23 december 2011
• Diasabra 24 december 2011
• Diadomingo 25 december 2011
• Dialuna 26 december 2011

Riba e dianan aki tur notificacion di AO lo wordo tuma entre 7:00 di mainta y 11:00 di mainta na 527-2782.
Diamars 27 di december e orario normal pa notifica AO ta drenta na vigor atrobe.

Nos ta ofrece nos disculpa pa e inconveniencia aki.

Publica