SVb Ta Clarifica Splitmento: “Reparatietoeslag” No Ta Forma Parti Di E Pensioen Di AOV

PICT1532Recien Banco di Seguro Social, SVb, a informa comunidad di Aruba y pensionadonan en particular, cu a cuminsa cu splitmento di pensioen di parehanan pensionado. Esaki pa cumpli cu articulo 4 di e directivo 79/9 di Comunidad EEG  cu ta indica cu ambos persona casa tin derecho riba pensioen di AOV.

Den e comunicado aki tambe a indica cu ora suma e dos pensionnan cu a split, hunto esaki lo ta mes un suma di e pensioen cu tabata ricibi prome.

Pa ilustra esaki lo uza un ehempel. Un pareha casa, cu ambos a biba henter nan bida aki na Aruba y tur dos a cumpli caba e edad di pensioen, ta ricibi prome cu e splitmento pa luna e suma di Afl. 1.780,- florin di pensioen di AOV mas tabata ricibi Afl. 200,- florin di reparatietoeslag. Pues en total e pareha tabata ricibi Afl. 1.980,- florin tur luna.

Aki mester aclaria cu e reparatietoeslag ta un compensacion cu Gobierno di Aruba ta otorga, mediante SVb, na e pensionado. E reparatietoeslag no ta forma parti di e pensioen di AOV. Siguiendo cu e ehempel anterior, na momento cu SVb split e pensioen, cada persona lo ricibi riba nan cuenta separa of e cuenta di banco hunto Afl. 890,- florin di pensioen di AOV mas Afl. 100,- florin di reparatietoeslag. Pues ambos persona ta ricibi Afl. 990,- florin pa luna. Si conta tur dos pensioen hunto, lo yega bek na Afl. 1.980,- florin.

SVb a manda un carta cu e decision di e splitmento pa tur pensionado casa. E decision cu SVb a manda ta menciona e suma di pensioen di AOV, esaki no ta inclui e reparatietoeslag. Manera a indica aki riba, e reparatietoeslag no ta forma parti di e pensioen di AOV, pero ta un compensacion di parti di Gobierno di Aruba.

Pues, biniendo na nos ehempel, e dos pensionadonan casa den nos ehempel, lo ricibi un decision cu ta menciona cu cada un tin derecho riba Afl. 890,- florin di AOV. E carta no ta menciona e suma di Afl. 990,- florin, cu ta e suma cu realmente ta keda deposita riba nan cuenta. Cada pareha por controla nan pensioen door di conta nan hunto. Den caso cu hunto nan no a ricibi e mes un suma cu prome, ta pidi e pensionadonan pa tuma contacto cu departamento di Pensioen di SVb na 527-2760.

Banco di Seguro Social, SVb, ta spera di por a aclaria dudanan cu por ta existi relaciona cu e splitmento di pensioen di AOV.

This entry was posted in AOV, Pensioen, Servicio di SVb and tagged , , , . Bookmark the permalink.