AOV y AWW ta keda paga riba prome dia di cada luna

Crecemento proyecta

Crecemento proyecta

Cu orguyo SVb ta anuncia cu entrante luna di september 2014 Departamento di Pensioen ta cuminsa paga e pensioen di AOV y AWW riba dia 1, esta e prome dia di cada luna. E espacio di esaki a ser crea despues di a introduci e sistema nobo na Pensioen, e asina yama sistema PRAS (Pensioen Registratie & Administratie Systeem).

Banco di Seguro Social Aruba SVb ta anuncia cu esaki ta dentra na vigor entrante e proximo pago di pensioen den luna di september.

Cu introduccion di e sistema aki 1 aña pasa SVb a finalisa e proceso di automatisa y digitalisa e proceso di pensioen di AOV y AWW. Awor cu tur e discrepancianan cual un sistema nobo ta bin cun’e a ser resolvi, SVb ta usa e espacio liber aki pa brinda un mihor servicio na su clientenan. Mirando cu e cantidad di pensionadonan a crece y ta sigui crece segun proyeccionnan pa e proximo añanan, SVb ta sigui inverti y asina por sigui brinda tur pensionado un nivel halto di servicio di parti di SVb.

SVb ta felicita y tambe gradici tur colega di Departamento di Pensioen kendenan a contribui grandemente na e exito di e sistema nobo. En especial SVb ta felicita sr. Luis Tromp, Hoofd di Departamento di Pensioen, cu e logro aki. Luis for di comienso cu a cuminsa na Departamento di Pensioen 3 aña pasa a visiona e cambio aki cu awe tur nos pensionadonan por haya un servicio mas eficiente y rapido di SVb.

SVb tambe kier a gradici tur nos clientenan pa e comprencion cu nos a ricibi den caso cu durante e prome lunanan despues di e introduccion di e sistema nobo algo por a bay fout cu nan pensioen.

Ta bon pa tuma nota cu den caso cu dia 1 ta cay riba un diasabra, diadomingo of un dia di fiesta, SVb ta paga e pensioen riba e proximo dia di trabao riba cual banconan ta habri. Bao ningun circumstancia SVb ta paga un pensioen prome cu dia 1 di e luna ariba cual e pensioen tin referencia.

Pa mas informacion por tuma contacto cu Departamento di Pensioen na 527-2760 of mediante email na pensioenen@svbaruba.org. Tambe por haya informacion di pensioen riba SVb su website na www.svbaruba.org/pensioen.

 

This entry was posted in AOV, AWW. Bookmark the permalink.