SVb ta introduci su Calculador di Pensioen

calcOtro servicio mas pa nos comunidad por ta mihor informa na momento di baha cu pensioen.
Diaranson atardi den presencia di Minister Alex Schwengle, director di SVb Ir. Edwin Jacobs y hefe di Pensioen sr. Luis Tromp a introduci un servicio nobo di SVb pa nos comunidad. Cu introduccion di e ley nobo di AOV riba 1 di januari 2015 ta importante pa nos comunidad ta bon informa. E edad nobo pa ricibi e pensioen di AOV lo bira 65 aña pero e cambio di edad di pensioen lo bay gradualmente cu mitar aña. For di awe cu introduccion di e calculador di pensioen por haya sa e fecha cu lo baha cu pensioen y cuanto esaki ta representa na entrada di AOV pa e pensionado.

Introduccion di e calculador ta den cuadro di e vision di Minister di Salud, Cuido di nos Grandinan y Deporte cu ta kere cu mester di un instrumento pa sostene e futuro pensionado planifica su entrada ora e ta pensionado. Banco di Seguro Social Aruba SVb ta kere cu e servicio nobo aki ta yuda duna claridad na tur su futuro clientenan cu lo bin proximamente na remarca pa cobra nan pensioen di AOV.

Na momento cu haci uso di e calculador di pensioen e persona lo haya sa, e fecha cu e ta bin na remarca pa cobra AOV. Tambe e programa ta calcula aproximadamente e suma di e pensioen cu lo cobra mensualmente segun e condicionnan cu tin awor aki. E suma mensual pa cada persona ta varia pasobra esaki ta depende di a cantidad di aña cu el a residencia na Aruba. Banda di esaki e persona lo haya sa ki dia e por aplica pa su pensioen di AOV na e servicio di pensioen di SVb.

E calculador ta facil y simpel pa usa. Pa calcula pensioen mester bay na http://verzuim.svbaruba.org:8090 https://pensioencalculator.svbaruba.org:5431, scoge e idioma Hulandes of Papiamento y e programa mes ta guia’bo pa haci e calculacionnan. E calculacion ta anonimo pero si ta importante pa yena tur area cu tin strea ya cu esakinan ta obligatorio.
E calculador ta brinda e oportunidad pa calcula e pensioen di tanto soltero como parehanan casa, asina tur asegurado por tin un bista cla con hopi nan entrada lo bira.

E servicio di “Flexpensioen” ta forma parti di e calculador, esaki ta encera cu e programa ta duna oportunidad pa calcula e flexpensioen tambe. Na momento di hinca e datonan aki e programa ta calcula e suma di e “Flexpensioen” y asina e ta duna un aproximacion con hopi e entrada lo bira. Cada persona e ora por dicidi si na momento di yega na edad di pensioen si nan ta desea di aplica pa e “Flexpensioen”.

Introduccion di e servicio nobo aki a bay cu e colaboracion di ITP Caribbean kendenan pa añanan caba ta traha den forma estrecho cu SVb. SVb ta convenci cu e programa lo beneficia nos comunidad y lo contribui pa tur por ta miho informa na momento cu baha cu pensioen.

Por bishita e Calculador di Pensioen akinan: http://verzuim.svbaruba.org:8090 https://pensioencalculator.svbaruba.org:5431

This entry was posted in AOV, Pensioen, Servicio di SVb and tagged , , , . Bookmark the permalink.