Pensioennan pa luna di juni ta keda paga na tempo

edwinBanco di Seguro Social SVb ta informa

PENSIOENNAN PA LUNA DI JUNI  TA KEDA PAGA NA TEMPO

 

Banco di Seguro Social, SVb, ta informa na tur pensionadonan di Aruba cu e fecha di pago di pensioen di SVb pa luna di juni ta keda dia 3 di juni proximo. Esaki ta conforme e calendario di pago cu SVb a publica na luna di december di aña pasa.

Pensioen di SVb ta keda paga na Aruba riba e dia 3 di cada luna y tur luna pensioen ta keda paga na comienso di luna. Den caso cu dia 3 di luna ta cay riba un diasabra, e pago lo keda efectua dia 2. Den caso cu dia 3 di luna ta cay riba  un diadomingo, SVb ta paga e pensioen riba dia 4.

Pensionadonan di SVb na Hulanda ta ricibi nan pago di pensioen no mas tarda cu dia 10 di cada luna. Y pensionadonan pafo di Reino Hulandes ta keda paga despues di e fecha 10 y como cu e pagonan aki no ta automatisa, esakinan ta tuma mas tempo cu e otro pagonan.

Na luna di mei, pa motibonan tecnico relaciona cu transicion di un programa di pension pa otro, un grupo di mas o menos 130 pensionado, di e total di mas di 18 mil pensionado, no a ricibi nan pago di pension na tempo. Mientras tanto, departamento di pensioen di SVb a identifica e causanan di e fayo tecnico y a resolvi esaki. Dia 24 di mei ultimo e departamento di pensioen a traha e payroll y tur cos ta indica cu e fayonan di luna di mei a keda elimina.

Cu e comunicado aki SVb ta spera di a coregi cualkier informacion cu por a crea e impresion cu e siguiente pagonan di pensioen di SVb lo conoce un retraso.

SVb y su empleadonan ta sigui traha na brinda su clientenan un servicio di calidad. Si tin cualkier pregunta of remarka por tuma contacto cu departamento di Pensioenen na telefon 527-2760 of por manda un email na pensioenen@svbaruba.org.

 

This entry was posted in Uncategorized and tagged , , . Bookmark the permalink.