SVb a automatisa nan banco di informacion di pensionado

Directeur Edwin Jacobs, Linda Semeleer, minister Visser, Luis Tromp

Directeur Edwin Jacobs, Linda Semeleer, minister Visser, Luis Tromp

ORANJESTAD, Aruba 18 di April 2013: Na e Servicio di Pension na SVb tabatin motibo pa celebra y esaki tin di haber cu final di e proceso di automatisacion di e banco di informacion di pensionadonan. Minister di Salud Publico y Deporte, Dr. Richard Visser tabata presente na e ceremonia oficial pa primi e boton pa asina duna inicio na un era nobo na SVb. Esaki sigur ta un paso hopi importante pa SVb. Ir. Edwin Jacobs como director di e organisacion a duna di conoce cu lo eleva e nivel di e departamento.

SVb awor ta haciendo uzo di e sistema di pension PRAS (Pensioen Registratie Administratie Systeem). Anteriormente nan tabata traha cu un sistema di pensioen, pero e diferente procesonan di trabao a keda apart y fragmenta, el a bisa. Cu e sistema nobo aki ta integra e procesonan contribuyendo na eficiencia den e trabao ya cu e ta tuma menos tempo. Segun Jacobs, banda di esaki tabata tin un proceso di digitalisacion di archivonan di pensioen cu ta mas o menos 20 mil map di clientenan cu a wordo digitalisa. E dos proyectonan aki ta pone cu e eficiencia ta bay aumenta como tambe e servicio na e clientenan. El a agrega cu nan ta den un fase caminda e decisionnan cu SVb ta saca di pension ta bira simpel pa compronde y mas importante ta cu di awor pa dilanti cada decision bao di dje ta bay tin e nomber di e empleado di SVb cu a atende e caso. Esaki lo duna espacio pa mehora e servicio pa cu e clientenan. Cu e nivel di organisacion aki ta preparando SVb pa e retonan cu tin den futuro pa e Servicio di Pension. Door di envehecimiento e cantidad di pensionado ta bay ta aumentando y ta bay alcansa 35 mil cliente na cierto momento. Cu e sistema aki ta yuda atende un grupo grandi di pensionado sin cu ta pone un presion grandi riba e funcionario, espacio di trabou y otro medionan.

Minister Dr. Richard Visser di su banda a expresa cu SVb a dal un paso masha grandi cu esaki y ta algo cu ta pushando den tur departamento di cuido manera Hospital, AZV, docternan di cas, entre otro. Esaki ta proyectonan cu pa basta tempo ta trahando riba nan y cu awor ta yegando nan punto final. E sistema di PRAS na e Departamento di Pensioen di SVb lo spaar tempo, lo facilita e pagonan y cambionan cu tin relaciona cu e pensionadonan. “Tur esaki ta bay ta mas lihe, mas facil pa duna un miho servicio y mehora nos calidad di salud”, asina Dr. Richard Visser a señala. Luis Tromp, hefe di e Servicio di Pension ta e persona tras di e proceso aki pa e por a wordo hinca den otro hunto cu e compania ITP. El a laga sa cu incorporacion di e sistema aki lo traduci su mes den un adelanto grandi di servicio cu lo bay duna awor na e pensionadonan. E producto final ta sali mas lihe, pero ademas di esey, e coleganan ta labora den un ambiente mas placentero.

E informacionnan tabata semi-automatisa, pero usando diferente programa manera Word, Exel, etc y cu awor a integra tur den un solo sistema y plataforma. E proceso a bira mucho mas eficiente, mas sigur pero mas cu tur cos, e informacion ta accesibel mas lihe! E conversion di e clientenan existente a tuma luga caba pa e sistema PRAS y awor SVb ta cla pa sigui e proceso nobo aki.

This entry was posted in AOV, AWW, Pensioen and tagged , , . Bookmark the permalink.