Servicio Postal ta partiendo formulario pa “Extra Reparatie Toeslag”

Extra ReparatietoeslagDialuna awor lo por cuminsa entrega e formulario cu a manda na cas; SVb a habri 8 centro pa entrega e formulario mas cerca di cas

ORANJESTAD, Aruba – 15 di februari 2013: “Servicio Postal tin e cartanan y aunke cu un cantidad a yega na e adresnan caba, tin un grupo grandi cu lo ricibi nan carta den e dianan nos dilanti”, asina Ir. Edwin Jacobs, director di SVb a anuncia. E ta referi aki na e campaña cu a inicia pa ricibi peticion di pensionadonan pa “extra reparatie toeslag” di 50 florin mensual riba e pensioen regular.

Di acuerdo cu Servicio Postal, den dos siman di tempo tur pensionado mester a ricibi nan carta den cual ta inclui un peticion. Si pa inicio di Maart ainda e pensionado no a ricibi su carta y formulario na cas, e lo por djis bishita un di e 8 centronan di entrega pa busca un formulario eynan, yen’e y entreg’e mesora.

E centronan lo ta habri desde dialuna 18 di februari for di 12or di merdia pa 8or di anochi. Na Oranjestad  na Centro di Bario Playa Pabao; na Dakota na Centro di Bario Dakota; na San Nicolas na Santa Theresita Center; na Noord na Centro di Bario Noord; na Tanki Leendert na Centro di Bario Tanki Leendert; na Savaneta na Centro di Bario Savaneta; na Piedra Plat na Centro Caiquetio y na Santa Cruz na Club Estrella.

Tambe lo por pasa na e seccion di pensioen di SVb na Vondellaan 21 of na San Nicolas den Bernhardstraat 71 pa ricibi un formulario. Por yena y entrega e formulario di biaha na e puntonan di entrega of tambe na e seccion di pensioen di SVb. Por entrega e formulario aki te cu fin di maart pa asina ricibi e Extra Reparatie Toeslag retro-activo desde januari 2013.

 

Ta corda tur hende cu si no ta bin na remarca pa ricibi e “Extra Reparatie Toeslag”, cu no ta necesario pa yena ni entrega e formulario. Pa mas informacion por email info@svbaruba.org of yama 527-2760.

 

FIN

 

This entry was posted in Pensioen and tagged , . Bookmark the permalink.